uMthunywa
KULIVIKI sixoxa leqembu labesintwana abathi loba bebhekana lobunzima abakhathali, abalahli ithemba bavumele ubunzima lobu bubabuyisele emuva kodwa kwabenza babalokuzimisela okukhulu. Leliqembu selike lathola isicoco ngenxa yobungcitshi kwezokugida. Selike lathola lethuba lokuthi liyegida lezingcitshi zabahlabeleli abakhulu. Zwana okunengi ngeqembu leDynamite Chicks kungxoxo elandelayo phakathi kuka Samkelo Tshuma lomaneja waleliqembu uChiedza Mapfumo.
ST: Sichazele ukuba ungubani ovela nga?
CM: NginguChiedza Mapfumo, ngivela eGokwe kodwa ngenzela izifundo zami koBulawayo.
ST: Sitshele ngembali yeqembu lenu?
CM: Iqembu lethu yi-Dynamite Chicks lasungulwa ngomnyaka ka2011 ngemva kokuba sisuke kwelinye iqembu elibizwa ngokuthi yiGreen Gardens. Lilamantombazane ayisithupha. Mina ngingu maneja waleliqembu, u-Dorcus Tshuma nguMarketing maneja weqembu lethu
ST: Ligida mgido bani?
CM: Sigida i-Zim dancehall, rumba, umsebe, raggae, house kunye lezomdabuko.
ST: Kwabangelwa yini ukuthi lisuke kuleloqembu?
CM: Kwasekulengxabano ezinengi, ngakho sabona kulicebo elihle ukuthi sisuke siyebumba elethu iqembu
ST: Lahlangana ngaphi lalabo ogida labo?
CM: Sasuka sonke kuqembu le Green Gardens, leloqembu lalihlangene kunye labafana.
ST: Waqala nini ukuthanda ezokugida?
CM: Ngaqala ukuthanda ukugida ngisagidela iMpopoma ngingakayi gida eGreen Gardens.
ST: Kungani lakhetha ibizo elithi Dynamite?
CM: Sakhetha leli bizo ngoba lalisichaza.
ST: Selike ladlala emicimbini emikhulu?
CM: Yebo ngomnyaka ophelileyo sike sadlala loSulumani Chimbetu
ST: Selike lathola isicoco?
CM: Yebo eHustlers sathola isicoco sokuba liqembu elagida kuhle ukwedlula amanye.
ST: Nhlupho bani eselike lahlangana lazo?
CM: Ukunganxuswa ukuthi siyedlala emicimbini yilo uhlupho esilalo.
ST: Kukhona okunye okwenzayo ngaphandle kwezokugida.?
CM: Hatshi yikugida kuphela.
ST: Khathesi kukhona yini lapho elinxuswe khona?
CM: Kumpelaviki ezayo sinxuswe endaweni ezitshiyeneyo; ngoLwesihlanu sinxuswe ukuyadlala eMasvingo ngoMgqibelo siyabe siseChibi.
ST: Nkuthazo bani ongayinika abatsha abasasungula amaqembu abo?
CM: Bangapheli umoya ngoba lindlela abayikhethileyo ayikho lula, babekezele. Bangagijimisi imali kodwa bazi ukuthi bafunani empilweni ngoba kulomncintiswano onzima phandle.
