uMthunywa
Arnold Ndlovu
KULENINA eligwetshwe ukuyapika ejele okwenyanga ngenxa yokuhlukuluza ubaba wengane yalo.
Inina leli uPerseverance Ncube oleminyaka yokuzalwa engu-23 ohlala elokitshini leCowdray Park ugwetshwe ukuyavalelwa okwenyanga ngemva kokuvuma icala lokuhlukuluza uGlenn Wheeler oleminyaka yokuzalwa engu-56 ongumamangala njalo belomntwana bonke.
Amacala etheswa umsolwa ngawokuhlambaza lokwethusela umamangala kumakhalekhukhwini.
Inkundla yeTredgold ikuzwile ukuthi mhlaka 20 Zibandlela ekuseni umamangala wathola imilayezo ku-whatsapp eyayivela kumsolwa emethusela njalo emthethisa. Amanye amazwe akhona agoqela athi:
“Akulalutho engilufunayo emuntwini osegugile njengawe, usumdala kakhulu ukuba ngubaba womntwana wami . . . Maduze nje uyabe ungaseyiyo ngxenye yempilo yakhe,” kutsho umbiko we-whatsApp.
Umamangala ngemva kokuthola umlayezo lo wahle wayamangala emapholiseni okwabangela ukuthi umsolwa abaotshwe.
Ngemva kokulalelisa icala leli umantshi uMnumzana Franklin Mkwananzi unqume ukuthi umetheswacala ayepika ejele okwenyanga egcweleyo ngemva kokuba ekhitshelwe inyanga ezintathu kukhangelelwe ukuthi uzaziphatha kuhle okweminyaka emine elandelayo.
