uMthunywa
YINJABULO iDistruction Boyz yodumo lwengoma ethi Omunye ikhethwa kumaMTV European Awards kuleli sonto.
Baswele amaphiko okundiza abangamalunga eqembu legqom’ iDistruction Boyz kulandela ukukhethwa kwabo kumaMTV European Awards.
Leli qembu likhethwe kuBest African Act.
Likhethwe lomkhaya uShekhinah ezihlabani zaseNigeria okunguTiwa Savage, Fally Ipupa loDavido.
UGoldmax uthe abakholwa ngokwenzekayo.
“Yizindaba ezithokozisayo lezi. Sijabule ngendlela eyisimanga. Lokhu kukhomba sobala ukuthi ukusebenza ngokuzikhandla kulembuyiselo lokuthi umculo wegqom’ ulekusasa eliqhakazile,” utsho kanje.
Loba iDistruction Boyz ibhekane labaculi abawola kwasani emincintiswaneni yezindondo okubalwa kubona uDavido wengoma ethi If, ozobe evikela lesi sicoco njengoba asinqoba nyakenye. Yize kunjalo kodwa iDistruction Boyz ithe ilethemba lokunqoba.
UGoldmax uqhube wathi ngokubambisana lozakwabo uQue, balethemba lokuthi bazobuya layo lindondo bajabulise isizwe.
Lezi zindaba zivela nje leliqembu lodumo lengoma ethi Omunye, lisanda kunqoba indondo yeBest Gqom Album emcimbini wamaDance Music Awards. Uma inqoba iDistruction Boyz, kuzobe kungaqali ukuthi kube lomculi wakuleli obuya lale indondo. Ngo-2006 iFreshlyground yabuya layo, yalandelwa yiLCNVL ngo-2013.
Umcimbi wamaMTV European Awards uzakuba khona mhlaka 4 Lwezi eBilbao Exhibition Centre eSpain. — Ubulembu
