IChibuku Cup ingena eTriangle

08 Nov, 2018 - 00:11 0 Views
IChibuku Cup ingena eTriangle

uMthunywa

Nkosilathi Sibanda
OKWAKUQALA kumbali yenkezo yeChibuku Super Cup, umdlalo we-final uzaqhutshwa enkundleni ephandle kwamadolobho amakhulu, okuyisinqumo esihle esibatshazwe ngabasekeli bomdlalo.
NgoMgqibelo emini indlela ziqonda eGobbo okulikhaya leqembu leTriangle elizanxusa intshantshu zika-2017 iHarare City. Leliqembu laba yintshantshu ngesizini ka2015 njalo.

Ngesizini ka2016 kwanqoba iNgezi Platinum.

Kumidlalo edluleyo yalinkezo, besekujwayelekile ukuthi i-final ikholiswe ngababukeli bomdlalo abahlala emadolobheni aphucukileyo.

Lonyaka kutshintshiwe ngoba kubonakele ukuthi iqembu leTriangle lisebenze nzima ukuthi lifikise lesi isibanga somncintiswano.

Phezulu kwalokhu, iTriangle isiyedlule isifikise isibanga sama-semi-final eChibuku Super Cup kusukela kusungulwa linkezo.

Inkundla yeGibbo ayimangalisi kodwa isingena kumbali yokuqhuba inkezo enkulu kunguqu yakuleli ngempelaviki.

Kulandela isinqumo lesi, lenhlanganiso yePremier Soccer League isiyethule ukuthokoza kwayo.

Ekhuluma loMthunywa ngoLwesibili emini, uKudzai Bare isikhulumi sePSL uthe ukuqoqwa kwe-final eGibbo kuzakhuthaza amanye amaqembu angaphandle kwamadolobho amakhulu.

“Akube yingqobe kwamanye amaqembu ukuthi adlale kuhle kumasizini alandelayo. Umncintiswano weChibuku Super Cup lo ngowamaqembu wonke akuligi yePSL ngakho ukudlalwa kwe-final enkundleni yeGibbo kusitshiya sithokoza ngempela,” kutsho uBare.

Isikhulumi lesi sithe umdlalo wangoMgqibelo usabalalisa umncintiswano weChibuku Super Cup lapho ongakaze ufike khona.

“Lokhu kuzajabulisa lenengi labalandeli beligi yethu abahlala eTriangle lakwezinye indawo eziseduzane abangakaze babukele umdlalo olesisindo njengalo.”

Abalandeli boqobo bakanobhutshuzwayo babike ukuba abaqoqi beChibuku Super Cup benze kuhle ukufinyelelisa inkezo le kundawo ezikhatshana.

Kusenjalo, sekudonswa amabhulugwa kubaqeqetshi bamathimu womabili umdlalo ungakafiki.
Bobabili abavumi ukunqotshwa.

UTaurayi Mangwiro oqeqetsha iTriangle useveze ukuthi ngobungcitshi alabo kunguqu lakumincintiswano yenkezo le, ithimu yakhe ingatshiya iHarare City igoqe umsila.

“Ithimu izanqoba. Siphezulu kokuqeqetsha enkundleni yethu esiyijwayeleyo. Injongo yikungavumi ukuthi siyangeke phambili kwabasekeli bethu.

“Nxa sidlala ekhaya kuyaziwa ukuthi silenguqu emnandi ngakho ngeke kumangalise singanqoba inkezo yeChibuku,” kutsho uMangwiro.

Enkambeni yeHarare City kubikwa abadlali lomqeqetshi wabo uMark Harrison sebezibona bezintshantshu.
UHarrison wazise uMthunywa ukuthi ulande ukuyagcina inkomitsho yabo ngoMgqibelo.

“Sifuna ukuyigcina inkezo le. Iqembu esidibana lalo lisekhaya ngakho kusenza sibeliqembu elincane, kodwa lokho akutsho lutho kubadlali bami asebethembise ukuthi inkezo izaphenduka kithi. Akulindwe mhla welanga.”

Ukufinyelela lesi isibanga senkezo, iHarare City yadlala yonke imidlalo eRufaro. Yaqala yanqoba iBulawayo City nge 1-0, yakhipha iHighlanders 2-0 anduba itshaye iCaps United 2-1.

ITriangle, echinsa ukutshibilika ku-final le yanqoba iShabanie Mine nge 4-1 kumbekwa. Kuhlandla elalandelayo yanqoba iNichrut 5-1. Kumdlalo wama-semi-final yakutula iDynamos 2-1.

Iqembu elizakuba yintshantshu yalinkezo lizaphiwa ithuba lokuthi lidlale kumqhudelwano weCaf Confederations Cup ngoZibandlela.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds