uMthunywa
YiNtatheli kaMthunywa
KUTHE selithole abalandeli abedlula izigidi kukhasi labo leTwitter, iqembu leBulawayo Chiefs libongwe kulumnyaka ngokunikezwa isicoco seqembu esilophawu oluphezulu okuthiwa yiTwimbo Awards Best Brand.
IBulawayo Chiefs yandiza kubulembu beTwitter yaze yasekelwa liqembu lase-Italy iAS Roma. Loba lisinde ukukhitshwa kuligi yeCastle Lager, leliqembu litshayelwa ihlombe ngokuthi lidlale inguqu yalo kakuhle ku-Twitter kulasenkundleni.
Umbiko wokunqoba kweChiefs kuTwitter iphume kuliviki yeKhisimusi.
“Isicoco salumnyaka siya ku@BulawayoChiefs. Iqembu leli libe lekhasi eliphezulu kulawo wonke kuTwitter. Akuthandabuzwa lokhu. Ngemva kokusekelwa yiAS Roma, ngempela bekungumnyaka omuhle. Silifisela okuhle ngesizini ezayo, ikakhulu enkundleni yomdlalo,” ngumbiko ovela kuTwimbo Awards.
Iphephandaba likazulu kumaviki ambalwa adluleyo labika ukuba iBulawayo Chiefs yakhuthazwa yibunengi babalandeli balo kuTwitter okwayinikeza idlabuzane lokuthi libambelele kuligi.
Okwamanje ikhasi le @BulawayoChiefs lilabalandeli abaphezulu kwe-11 000. Kunyanga ezintathu esezedluleyo, Amakhosi Amahle ayelandelwa ngabantu abedlula i6 000.
IBulawayo Chiefs isithole abalandeli abangakaze badonswe ngamaqembu alodumo ngesikhathi esifitshane.
