‘IBOSSO AYILANKINGA LEKHALENDA’

‘IBOSSO AYILANKINGA LEKHALENDA’

0 251
UNhlanhla Bahlangene Dube

YiNtatheli kaMthunywa
IQEMBU likanobhutshuzwayo iHighlanders libika ukuthi ukutshintshwa kwekhalenda yokudlalwa kweligi yePSL ngesizini ezayo akusoze kuyiphazamise, kutsho umaqhuzu wayo uNhlanhla Bahlangene Dube.“Asilankinga ngecebo leli. Siyazwisisa ngendlela ezinengi. Njengeqembu elancintisa kumidlalo yase-Africa, kuyazwisiseka sibili ubunzima bokuthi uncintise lamaqembu alungiselele kuhle.”

Ebuzwa ngesimo seqembu, uDube uthe bayasuthiseka ngomdlalo wabafana abasakhulayo.

“Abafana benze kuhle. Lo bekungasi mnyaka wokudlalela iligi kumbe inkezo, besisebenzisa ithalenta lasekhaya ukwakha ithimu. Ngomnyaka ozayo kuzagijinywa,” kutsho umaqhuzu lo.

UDube ukhulume kanje kulandela isimemezelo esivele kunhlanganiso yePremier League leZimbabwe Football Association esokuthi isizini ka2019 izaqala ngoNkwenkwezi isiyaphetha ngo-2020 ngoNcwabakazi, njengalokhu okwenziwa ngamanye amaligi.

Icebo leli livela ekuthini inkokheli zebhola lenyawo kuleli sezifuna ukuthi kube lula kumaqembu azancintisa kumqhudelwano weChampions League le-Confederations Cup.

Ekhuluma kabanzi esemsakazweni ngoLwesibili uDube uthe loba besekela ngokugcweleyo icebo lokutshintsha ukuqala kweligi kuzamele kuchasiswe ukuze wonke amalunga enguqu abeke imbono yawo.

“Loba kunjalo, sinanzelele ukuthi kukhona okuthile okumele kulungisiswe ngoba kuhlasela amaqembu. Akukhulunywe labo bonke abaphatheka kulumdlalo. Amaqembu awalankundla, inkundla lezi ziyabhadalelwa ngoba ngezamakhansili. Umzekeliso yiBarbourfields, okwaziwayo ukuba ihlutshwa yi-drainage. Amakhansili kukhulunywe lawo ukuze icebo lokutshintsha iligi liphumelele.

“NjengeBosso kuzamele siguqule lekhalenda yethu, ikakhulu isikhathi esethula ngayo ama-report ethu, imihlangano yethu, sikhulume lama-sponsors futhi. Kumele kubekwe icebo eliqinileyo,” kutsho uDube.

Iligi yakuleli iphela ngoLwezi ukuze kuphangwe kubhaliswe amabizo abadlali abaphatheka kulimidlalo yase-Africa edlalwa ngoNtulikazi.

Ngaleso isikhathi amanye amaligi ayabe esevutha, okuyikho okunceda ekuthini adlale kuhle.

Nxa kuzaphumelela, kutsho ukuba ibhola lizadlalwa ngesikhathi sezulu lasebusuku.

SIMILAR ARTICLES

0 73

NO COMMENTS

Leave a Reply