uMthunywa
YiNtatheli kaMthunywa
UMGADLI we-Ajax Cape Town uTendai Ndoro uthi akumkhathazi lakancane ukukhonona kwe-Orlando Pirates ngokufakwa kwakhe eqenjini elitshaye amaBhakabhaka nge-3-0 kowe-Absa Premiership.
AmaSea Robbers abekhalaza nje kulandela isinqumo seDispute Resolution Chamber ye-PSL esivumele ama-Urban Warriors ukuthi adlalise uNdoro ngaphandle komthetho weFifa othi umdlali akavunyelwa ukudlalela amakilabhu amathathu ngesizini eyodwa.
Umdlali lo wadlalela amaBhakabhaka ngasekuqaleni kwesizini ngaphambi kokuyodlalela i-Al Faisaly yaseSaudi Arabia wayebuyela kokubuyela ku-PSL.
UNdoro, oleminyaka yokuzalwa engu- 32, uthi akumkhathazi lakancane ukudluliswa kwesinqumo yi-PSL kanye lokukhalaza kwePirates ngokudlaliswa kwakhe.
“Bekulodaba olukhona manje ngiyajabula ngoba sengiyakwazi ukudlala ibhola, ngakho ngila ku-Ajax. Ibhola selidlalwa emawofisini esikhundleni sokuba lidlalwe enkundleni,” kutsho lumdlali.
“Sizabona ukuthi lolu daba luphetha njani ngoba sengikhululekile manje. Ukube bekungenjalo bengeke ngivunyelwe ukuba ngidlale.”
I-Ajax Cape Town isimemezele ukuthi uTendai Ndoro uzabonakala emdlalweni nxa ikilabhu yakhe entsha ikhangelane le-Orlando Pirates kulandela isinqumo se-PSL ngempikiswano ebikhona.
Ngaphambi kokujoyina ama-Urban Warriors, uNdoro wadlala imizuzu embalwa kuPirates, kwathi ngokuhamba kwesikhathi wasayiniswa yi-Al-Faisaly. Lokho akazange ahlale kakhulu eSaudi Arabia wabe esebuyela kuPremiership wajoyina ezikaMuhsin Ertugral.