uMthunywa
YiNtatheli kaMthunywa
INHLANGANISO ephethe umdlalo we-basketball esabelweni seMatabeleland North iphezulu kwamalungiselelo okunxusa amaqembu kumkhosi wokuvala umnyaka ozaqhutshwa eFolosi.
Minyaka yonke ngalesi isikhathi inkundla zalumdlalo ziyavutha kubangwa ukuthi yiliphi iqembu elizabhuqa amanye ikhisimusi ingakafiki. Ngesizini ka-2017, kwadibana amaqembu ayedlula itshumi eHwange.
Lonyaka kubikwa kungenzeka kwengezwe amaqembu.
Esethula loludaba, umongameli we-basketball eMat North uPendrick Ndlovu ubike ukuba inhloso yabo yikuqhuba lumncintiswano ngendlela yokuthakazelela lekhefu lokubambana kwesizwe elithakazelelwa mhlaka 22 Mpalakazi.
Uthe inhloso yabo yikuthi basebenzise umdlalo we-basketball ukukhuthaza abasekeli bemidlalo ngokuqakatheka kokubambana.
“Lonyaka siyaphinda futhi ukwenza umncintiswano wethu wokuvala umnyaka lokuthakazelela ikhefu lokubambana. Okwamanje angeke sitsho ngokupheleleyo inani lamaqembu azadlala kodwa sinxuse amaqembu avela eZambia lamanye akuleli adlala kwezinye izabelo.
“Amaqembu la azagqikilana kubangwa yona inkezo ye-Unity Day. Intshantshu zanyakenye iUnicorns kumele zilungiselele ziphelele ngoba lonyaka umncintiswano uthembisa ukuthi uzabe ulukhuni,” kutsho uNdlovu.
Kumaqembu akhangelelweyo kubalisa intshantshu zomdlalo eMat North iHwange Heats, iBlack Hornets, iOilers, iGhetto Magic, iAngels, iUnicorns yaseGweru lezimbili eziphuma eZambia.
