uMthunywa
YiNtatheli ka Mthunywa
ABABONA ngezokuqhutshwa kwemidlalo ye-volleyball kuleli, abeZimbabwe Volleyball Association (ZVA) sebeveze ukuthi bawulindele umncintiswano we-All Africa Games, ngamehlo abomvu.
Kuzwakale ukuthi iqembu leZimbabwe lalo lisemathubeni amahle okuthi lingene kumncintiswano we-All Africa Games ngoba kulomdlali wakuleli othenjiweyo, uMurrey Pole Ndlovu, odume kakhulu kwezomdlalo lo njalo edlalela kweleJapan.
Umdlalo we-volley ball uya ukhula kweleZimbabwe njalo kulesidingeko semali kanye lokuthi kuqhutshwe amaligi azenza kube lomncintiswano, ukuze kubunjwe iqembu lesizwe elizancintisa kumqhugelwano emikhulu efana labo-All Africa Games.
Ekhuluma esenkundleni yokulolonga ithimu esigodlweni eHarare, kuliviki, unobhala weZVA uRingisai Mapondera uthe sebekhangelele kakhulu ukuthi kubeleqembu lakuleli elizancintisa kuma All Africa Games kunyanga kaMpandula.
“Sesibophe isinqumo sokusekela ngokugcweleyo imidlalo ye-volleyball, ikakhulu amaqembu azenelisa ukuthi angene ku-All Africa Games. Sizabona ukuthi amaqembu la azaphatheka ngokugcweleyo kanye lokuthi ayaphatheka ekulolongeni, ukuze umthwalo wabo ubelula nxa bedibana lamanye,” kutsho uMapondera.
Kuzwakale ukuthi umncintiswano we-All Africa Games kawukazakali ukuthi uzaqhutshelwa ngaphi kodwa iqembu lamadoda yilo eselangenayo kumncintiswano wenkezo yeBeach Volley Ball Continental Cup.
