Uncategorized

‘I-xenophobia isiwisele ibhizimusi’

23 Apr, 2015 - 11:04 0 Views
‘I-xenophobia isiwisele ibhizimusi’

uMthunywa

Msilisi Dube
OMALAYITSHA bakoBulawayo bakhala ngokwehla kwebhizimusi lokuthwala abantu besiya eGoli ngenxa yokuba abantu bakuleli sebesesaba ukuyahlukuluzwa kunye lokubulawa kulelo.Kubikwa ukubulawa kwabantu eGoli sekudale ukuba abantu bakuleli besabe ukuyadinga umsebenzi  loba ukuyavakatsha ngoba besithi bazabulawa yizizalwane zakulelo.

Omalayitsha abakhulume loMthunywa baveze ukuba sebebalutshwana abantu abagada amabhasi kunye lakibo ngenxa ye-xenophobia le.

“Ikhombi yami lokhe ingakagcwali kusukela ekuseni. Kade ngizama ukubiza abantu kodwa sekugade abantu abangu-12 kuphela okuyikho okutshengisa  ukuba abantu sebesesaba ukuya eGoli.

“Sengizame lokwehlisa intengo ngisenzela ukuhuga abantu ukuthi bagade kodwa kuyehlula,” kutsho uMeluleki Moyo.

Kubikwa ukugada ibhasi umuntu esiya eSouth Africa bekuyi $350 kodwa sebesenza $300.

UMnu Moyo uqhubekele phambili wathi isimo esikweleSouth Africa sibi kakhulu yikho abantu sebesesaba ukuyakhona kungakho abantu abahlukuluza abantu kumele babotshwe ngoba bebulala abantu abangelacala.

“Abantu beGoli babulala abantu abangelamacala yikho nje abantu sebesesaba ukuhamba kodwa lathi lokhu sekusibulala ngoba kasisatholi lutho kubhizimusi yethu lemuli zethu sezize zilamba njengoba nje sekulamaviki amathathu isimo sisibi,” kuchaza uMnu Moyo.

Omunye njalo umalayitsha othande ukwaziwa ngokuthi nguThabo uthe abantu bengekela ukugada kuze kuyefika uMvulo kasoze aphide atshovise futhi.

“NgoLwesibili kuviki edluleyo ngihambe ngithwele abantu abahlanu kuphela ngisiya eGoli. Angizange ngithole imali enengi ngakho sengicabanga ukuzihlalela ngoba kuyangibulala lokhu.

“Isimo kasisihle ngakho kungaqhubeka kunje lamabhasi kawasoze athwale abantu besiya khonale. Uthola emabhasini kulabantu abangafiki ngitsho ingxenye yebhasi.

“Ibhasi kayisoze ihambe umango omude kangaka ithwele abantu abalutshwana kangaka,” kuphetha uThabo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds