uMthunywa
Nkosilathi Sibanda
ABADLALI labonompembe benguqu bakuleli sebejoyine inengi labantu abangahambisani lokusetshenziswa kukanompembe obizwa ngokuthi yiVideo Assistance Referee (VAR).
Ngokokuqala iVAR isetshenziswe emqhudelwaneni omkhulu njengeWorld Cup eRussia.
UKudakwashe Mahachi otshibilikela iOrlando Pirates, uFelix Chindungwe owake wabangukaputeni weHighlanders leChicken osekuHwange FC loMudzingwa baxoxe lephephandaba likazulu ngeVAR esiguqule inguqu.
UMkhuphali Masuku oqeqetsha iTalent Vision ngomunye ongayizwisisi kakuhle iVAR.
“I-VAR yenza iWorld Cup ingajabulisi ikakhulu nxa sekumele kumiswe umdlalo kulindwe ukuthi yona iboneni.
Kukanengi iVAR itshengisa ukuba layo ilamakhethe,” kutsho uChindungwe.
UMahachi uthe: “Yisiqalo esitsha kunguqu, silethemba akusoke kuphazamise umdlalo kwezinye indawo.
Umdlalo webhola lenyawo kumele uvumele abadlali badlale besazi ukuthi loba yini ingenzeka.”
UMudzingwa oyimvimbi ngokudlala kwakhe uthe unompembe kamabonakude uzajezisa imvimbi kakhulu.
“Singakhangelisa inani lembekwa ephiwa kumidlalo yeWorld Cup iveza ukuthi imvimbi sekuzamele zidlale zinanzelela ngoba khathesi akusela lapho okucatsheka khona nxa unompembe esenkundleni engabonanga lutho.”
Omunye wabalandeli uDuduzo Sibanda odume ngelithi ‘Teekay’ ubike ukuba iVAR izaxabanisa abantu, yenze umdlalo ungakhwabitheki.
Uthe nxa isitshenziswe kuhle imbono yeVAR izakwenqabela ukumemetheka kodlame oludalwa ngonompembe abenze amaphutha.
“Thina njengababukeli abangakhuthi ukungena emdlalweni yonke akusijabulisi ngoba inguqu imnandi ilabonompembe ababona kanye. Kodwa singakhohlwa ukuthi imsindo ejwayele ukubakhona ikakhulu nxa kudlala iBosso leDynamos ingaphela.
“Nxa unompembe eqila, lapha kuVAR kungahle kuphele akwenzayo,” kutsho uTeekay.
Kuliviki kwenzeke isimanga iVAR iphika umbekwa unompembe eseyinikile iBrazil idlala leCosta Rica.
