I-Copa Coca-Cola @ 30 eNkabazwe

I-Copa Coca-Cola @ 30 eNkabazwe

0 123

Nkosilathi Sibanda
IZIKOLO zizakuthi gwaqa eNkabazwe kusukela ngoLwesine kubangwa inkezo yeCopa Coca-Cola Under-15 esifikise iminyaka engamatshumi amathathu incintiswa kuleli.

Imidlalo yalonyaka iqakatheke kakhulu kumbali yalumncintiswano nanko phela ngaphandle kokuthi isifikise iminyaka engu-30, imivuzo izalingana kumaqembu abafana lamankazana.

Inkezo yeCopa Coca-Cola le yasungulwa kuleli ngomnyaka ka1989 koBulawayo.

Intshantshu zalonyaka zizaphiwa i$6 500 ngamunye.

Lonyaka kuzavuswa uthuli lwenkundla zesikolo seZvishavane High lapho okuzadlalela khona amaqembu amankazana. Isikolo seMandava sizaphatha abafana.

Kulandela ukufikisa ibanga elide kudlalelwa linkezo, inkampani yeDelta Beverages inikeze izikolo esezaphatha linkezo kanengi isipho sengwalo, yagcizelela ukuba yenze lokho ukuze itshengise abantwana besikolo ukuthi kumele lanxa besebenzisa amathalenta abo bangalibali ukufunda ingwalo zabo.

Isikolo seMzilikazi High koBulawayo ngesinye esathola ingwalo lezi.

UVee Chibanda isikhulu senkampani yeCoca-Cola kuleli uthe: “Sisekela inguqu yezikolo ngenkezo yethu yeCopa Coca-Cola okuyinto esithabisa kakhulu ngoba sixhasa ithalenta.

“Sekuleminyaka engu-30 sikwenza lokhu. IZimbabwe yilizwe lakuqala ukudlala linkezo ngakho siphambili. Isipho sengwalo lesi ngesokukhuthaza abadlali kuthi loba bezibona belekusasa enhle kunguqu, akumelanga bekele ukubala. Imfundo iligugu ngakho abaqine ngengwalo njalo,” kutsho uChibanda esethula umbiko wakhe.

Kusukela ngoLwesine kuze kuyegqitshwa impelaviki, kukhangelelwe ukuba kudibane izikolo ezibalisa esakoBulawayo iMpopoma High ehwatshe amathimu amabili, iSimbo Secondary leSomvubu ezeMatabeleland North.

Isabelo seMat South simelwe yiMtshabezi High leThekwane High.

Zonke zihlangene zingamatshumi amabili lane.

Umphathisikolo weGwanda High, ophinda abengumsekeli kaMkhokheli wenhlanganiso yabaphathi eyeNash, uArthur Maphosa ubike ukuthi imincintiswano enjengale kumele ibe yinkuthazo kuzikolo ukuthi ziqinele ezemidlalo.

“Okusithabisa kakhulu yikuphakanyiswa komntwana oyinkazana nanko i-Copa Coca-Cola isithe imivuzo izalingana. Yiso isiqalo sempumelelo leso. Abantwana abangamankazana bayaswela amathuba okuzibonakalisa kundawo ezinengi, kodwa imincintiswano yenguqu enjengeCopa Coca-Cola inikeza ithuba lokuthi abantwabethu baveze ithalenta labo.”

Abanqobi balonyaka, njengenhlalayenza, bazanikezwa ithuba lokuyamela iZimbabwe kumqhudelwano weAfrica ozahlanganisa amazwe abalisa iKenya, Uganda, Tanzania, Ethiopia, Angola, Mozambique, Zambia,  Malawi, Botswana, Namibia, Rwanda, Congo, Swaziland, Nigeria leSouth Africa.

Amankazana: Mpopoma High (Bulawayo), Simbo High (Mat North),Thekwane High ( Mat South), Chamakwanda Sec (Midlands), Birivenge school ( Masvingo), Vainona (Harare), Gweshe School (Mashonaland Central), Chenhuta Sec ( Mash East), Nyamaruru School ( Manicaland), Mwami Sec ( Mash West), Zvishavane High (abanikazi benkundla), Chidyamakono ( ababambe inkezo)

Abafana: Mpopoma High (Bulawayo), Somvubu Sec (Mat North), Mtshabezi High (Mat South), Guinea Fowl (Midlands), Pamushana High (Masvingo), Prince Edward (Harare), Kanyemba School (Mash Central), Waddilove High ( Mash East), Mutare Boys High (Manicaland), Pfupajena school (Mash West). Mandava High (abanikazi benkundla), Rusununguko High (ababambe inkezo)

SIMILAR ARTICLES

NO COMMENTS

Leave a Reply