uMthunywa
NguNdumiso Sibanda
INENGI labadlali abagidayo selaphelelwa ngumphako ngenxa yezizatho ezehlukeneyo ezibalisela ukuguquka kwezemidlalo kanye lokungami kuhle komnotho. Lezi yizizatho ezimqoka ezibangela ukuthi inengi lamalunga alamaqembu licine liphanyeka izicathulo zokugida lidinge ezinye indlela zokuziphilisa.
Amanye amaqembu adilizwa yikuqilana phakathi kwabadlali labaholi. Lanxa kunjalo kukhona abanye abadlali asebenelise ukumelana lenhlupho lezi kanti lemisebenzi yabo ilokhu ikhuphuka isiya kwamanye amazinga aphezulu.
Omunye walababadlali nguBukhosi Nyathi owaziwa ngelesitikini elithi Mr Jaiva. Ungazi kabanzi ngalumdlali kungxoxo elandelayo phakathi kwakhe loMthunywa.
Ungatsho ngamafitshane imbali yeJaiva Entertainment Company?
IJaiva Entertainment Company isungulwe ngomnyaka ka2010. Ngimanenja amaqembu okugida angu-8. Injongo yethu yikuthuthukisa abantu sisebenzisa umgido lokususa abantu ezitaladeni sibafundise indlela yokuziphilisa ngezemidlalo.
Yiwaphi amaqembu osebenza lawo njalo ibizo elithi Mr Jaiva walithola njani?
Ngisebenza lamaqembu athi Ziyawa Queens, iNew Age Crew, iBulawayo Queens and Kings, iShosholoza, iShikisha Mapantsula, iJaiva Queens, Ingwe Stars kanye lebhendi yeMr Jaiva and Jaiva Express. Ibizo elithi Mr Jaiva lavela ngoba ngingumuntu othanda ukugida .
Yibaphi abadlali elalifisa ukuba njengabo ngesikhathi lisungula i-Jaiva kanti yibaphi abanye abadlali abaziwayo eselake lasebenza labo?
Sasifisa ukuba njengoTongai Moyo, Koffi Olomide kanye loNkululeko Dube (umqondisi we-Iyasa). Sesake sasebenza njalo loKhuxman, Mjox kanye loJoe Maseko.
Amaqembu ezemidlalo amanengi aziwa ngokungaziphathi kwamalunga awo. Kukhona yini lakwelakho?
Njengazo zonke imuli, akusweleki ihlongandlebe. Akutsho ukuthi umthetho uyabe ungekho. Abadlali bethu sibathola endaweni ezehlukeneyo, baziphatha okutshiyeneyo kodwa siyazama ukukhuthaza ukuziphatha ngasosonke isikhathi.
Yona isakhona imali kwezemidlalo lezinsuku?
Imali ikhona ngoba lokhu ngangena kwezemidlalo angikaze ngiqhatshwe kwenye indawo, ngiphila ngazo.
Labangandulelayo kwezemidlalo uNkululeko Dube loSandra Ndebele baphila ngazo. Okudingekayo yikubekezela nje.
Umculo wakho uqhunswa ngendlela ekusuthisayo emisakazweni yakuleli?
Mina angisoli lutho. Inengi labadlali bakoNtuthu lihlezi likhonona kodwa abasi imisebenzi yabo emisakazweni. Labo abahambisayo labo kumele baqhube umsebenzi wabo, benze lama-show ukuze bazakale.
Ukhangelele ukwethula idlalade lakho kulinyanga. Ungasithi fahlafahla ngalo?
Idlalade leli lithiwa ‘Ndatorwa Moyo’. Lilengoma ezingu-8 ezibalisela phakathi kwezinye ethiwa, Fefeterwa, Umuntu lethi Rudo Rudo. Idlalade leli ngelengoma zothando njalo ngikhangelele ukulethula mhlaka 28 wayonale inyanga.
USandra Ndebele nguye ozabe engumhlonitshwa kanti kulabadlali lamaqembu amanengi azakokotshisa uzulu.
UMr Jaiva wazalwa ngo1983 Esigodini. Wafunda eTshalimbe Primary kanye laseShale Secondary. Wafundela ezemidlalo esikolo se-Inkululeko Yabatsha School of Arts (Iyasa) lapho aqeqetsha khona kwezokukhokhela.
Ngo2003 waqala ukuhlabela loSandra Ndebele andubana abumbe iqembu leNew Age ngo2004. Sewake wathola imivuzo yeHustlers kanye lowe-Iyasa oweBest Achiever ngo2005.
