uMthunywa
Ethel Ncube
KULENYANGA yakuWadi 8 eShale eMzingwane osekuzwakale ukuba igcina udiwo olulegazi labantwana ababhubhayo ngenhloso yokulisebenzisa ukubulala abantu kanye lokufaka ulunyoka, uMthunywa uyakuveza lokhu lamhlanje.
UJacob Ndlovu oleminyaka yokuzalwa engu-112 ohlala eShale njalo engusobhuku wakule indawo uhlahlulwe ngeviki ephelileyo watholakala elodiwo olulegazi alisebenzisa ukubulala abantu abamcaphulayo.
Kuzwakale ukuba uMnu Ndlovu oyinyanga kulesisigaba owaziwa ngokuthi nguNyangayami ubengathikazi ukubulala lo omkhubileyo ngoba ubethi angazonda aqonde ediweni lwakhe ayeqedelana lalowomuntu.
UMthunywa ufike esigabeni lesi ngoLwesibili kuyonale iviki waxoxisana lomunye umfakazi othande ukwaziwa ngokuthi nguMaMoyo nje kuphela waveza ukuthi uNyangayami lanxa elandula ukuthi ubelodiwo alusebenzisa ukuganga kodwa walukhipha mhla ehlahlulwa njalo labantu bebesazi mhlophe ukuthi ugangile.
“Ukhulu mina ngazizwela ngezami indlebe mhla ehlahlulwa ngumphurofethi kwathiwa ayethatha udiwo lwakhe aseqede ngalo abantu abuye lalo njalo kazange ale.
“Wahamba wayaluthatha wabuya eluthwele ngesaka, phakathi lwalulegazi njalo kusukela mhlalokho kaselaphi ngoba kaselamandla,” kulandisa uNkszn Moyo.
Intatheli ibuye yaxhumana lesinye isakhamuzi uQedamandla Dube yena othe uNyangayami kwathiwa ulodiwo olulegazi.
“UNdlovu (Nyangayami) ubeyinyanga eyesatshwayo esigabeni njalo ubengabhodwa kodwa ngatsha amathe sokuthiwa uyabulala abantu njalo ugcina legazi labantwana abancane abafayo ukuze aziqinise.
“Lokhu engakubonayo, ngiyesaba, lokhu ngingakukholwa njalo ngibona angathi liphupho ngoba uNdlovu wathutsha eluphethe udiwo lwakhe olulegazi ayelusebenzisa ukubulala abantu,” kutsho uMnu Dube.
Iphephandaba likazulu lizwe ukuthi igazi leli yilo njalo ebelimqinisa ukuze elaphe kuhle njengoba kukholelwa ukuba igazi labantwana abancane lilamandla.
Iphephandaba likazulu likhulumisane lesinye njalo isakhamuzi esihlala eShale uMnumzana Donga obike ukuba kunzima ukuthi inyanga le ivume.
“Kulihlazo ukuthi umuntu omdala njengoNdlovu njalo engumkhokheli wesigaba wayeganga, eqamba amanga esithi uyelapha kanti uyabulala.
“Yikho futhi okumenza alandule ukuthi watholakala elodiwo olulegazi kodwa mina ngambona ngawami amehlo eluphethe esiyalahliswa,” kuchaza uMnu Donga.
Intatheli ikhulumisane loMnu Ndlovu lo okucatshangelwa ukuba udiwo lolu ngolwakhe yena ophike wemba phansi ukuthi uyalwazi.
“Mina kumphurofethi lo angikayifika olwami unyawo alukalugxobi kodwa ngiyamuzwa ngendumela khona ngizayafika ngiyebona izimanga lezi okuthiwa uyazenza lumfana.
“Kanti uthi otholakale elodiwo olulegazi labantwana ngubani? Umphurofethi lo angimsoli yisikhathi sakhe laye usaphiwe. Mina bengiyinyanga kodwa khathesi kangiselaphi,” kutsho uMnu Ndlovu.
