uMthunywa
YiNtatheli KaMthunywa
INGCITSHI yenguqu yakuleli uPeter “Nsukuzonke” Ndlovu uthabe umanzi te ngokutshiya kobenguMongameli welizwe uRobert Mugabe esikhundleni.
UNsukuzonke ubengumdlali wenguqu wakuqala ukuthi abike owakhe umbono ngezombusazwe. Lokhu yisiqalo kulingcitshi, eyaziwa ngokuhlala izithulele lalapho okudingeka khona umqondo wayo.
Akujwayelekanga ukuthi abadlali benguqu bakhulume ngezombangazwe.
NgeSonto edluleyo uNdlovu uyibeke sobala indaba yakhe yokucunulwa nguMugabe ebulenjini buka-Twitter. Ngehola lika-4 ntambama ingcitshi le itshele umhlaba ukuthi uMugabe kahambe kuhle.
Kukhasi lakhe lika-Twitter @OfficialNdlovu uthe: “Isizwe siyindikimba umhlaba wonke. Bye Bye #Mugabe. Yikho okumele kwenzeke.”
Kulandela ukuthumela kwakhe umbiko lo, inengi labalandeli bekhasi lakhe baphosele imbono besithi wenze kahle uPeter wakhuluma. Lomabonakude we-BBC ubale ikhasi lengcitshi le ngoLwesibili ebusuku sekuzwakele ukuthi uMugabe esetshiye umsebenzi.
Umbiko kamaneja weMamelodi Sundowns lo uthandwe ngabantu abedlula amakhulu amabili njalo wedluliselwe phambili ngabanengi.
Phakathi kwalumnyaka uNdlovu wayebikele umhlaba ukuthi ulesifiso sokunikeza uMugabe ijesi lakhe lama-Warriors.
Ekhuluma leBBC, uPeter wayethe akula omunye umuntu angamupha ijesi lakhe ngaphandle kukaMugabe.
Okwamanje akwaziwa ukuthi uzalithola njengoba esetshiye isihlalo sokuba nguMongameli welizwe.
UNsukuzonke wadlalela ama-Warriors okwamahlandla alikhulu njalo wabangumdlali wakuqala ophuma eAfrica owadlalela kwele-Ngilandi.
