Fuyani inhlanzi, zilenzuzo enhle

Fuyani inhlanzi, zilenzuzo enhle

0 170
Inhlanzi zifuyeka ematankeni amanzi kumbe kuma-swimming pool abantu abayabe bengasawasebenzisi

Musa Janga
ABALIMI bacetshiswa ukuba bangene kubhizimusi yokufuya inhlanzi ngoba balutshwana abakwenzayo kukanti inhlanzi zilemali enhle.

Intatheli kaMthunywa ixhumane loMnumzana Cosmas Muzunde onguLivestock Specialist esabelweni seMatabeleland North obike ukuthi inhlanzi zilibhizimusi elihle elidinga abantu ukuba baliqhelise.

“Balutshwana abalimi abakuleli ibhizimusi ikakhulu esabelelweni sethu seMatabeleland,” kuchaza uMnu Muzunde.

Uthe inhlanzi zifuyeka ematankeni amanzi kumbe kuma-swimming pool abantu abayabe bengasawasebenzisi.

“Ofuya inhlanzi kumele asebenzise amatanka amanzi kumbe ama-swimming pool angasebenziyo. Zingavele zivume kuhle inhlanzi ekufuyeni sungenelisa ukuwodisela abanye ukuba bazithengisele kwezinye indawo.

Ngalokhu-ke uyabe sungazenzela imali yakho enhle.

“Umkambo wenhlanzi ubanzi ngoba ziyisitshebo esihlabusayo njalo abantu bayazithakazelela ngoba ziyikudla okwakha umzimba,” kutsho uMnu Muzunde.

Uqhubeke esithi ngaphandle kokuba ziphathise kwezempilakahle inhlanzi azihluphi ukufuya njalo lokudla kwazo akuduli.

“Ukufuya inhlanzi kungabe kubukeka kungumsebenzi onzima kodwa ungathola ulwazi olubanzi uzananzelela ukuthi kulula kakhulu,” kuchaza uMnu Muzunde.

Ubuye wathi abalimi abafisa ukufuya inhlanzi bakhululekile ukuzodinga ulwazi ehofisini yabo.

“Siyazi banengi abangabe befisa ukungena kubhizimusi yenhlanzi ngakho odinga ulwazi ukhululekile ukufika emahofisini ethu sizomabela ulwazi ukuze sithuthukise ilizwe lethu,” kuphetha uMnu Muzunde.

SIMILAR ARTICLES

NO COMMENTS

Leave a Reply