uMthunywa
YiNtatheli kaMthunywa
OKWENZEKA kwezemidlalo ngo2015 sekwedlule kodwa okuhle kwakhona akumelanga kukhohlakale. Lamuhla uMthunywa ubuyela emuva, sikhumbuzana ngalokhu okwakusegudwini.
Okuhle:
► IHighlanders yintshantshu yenkezo yeEasyCall ka2015. Okwajabulisa abalandeli bomdlalo yikuthi iBosso yanqoba isitha sayo esikhulu kunguqu iDynamos 2-1 kuhlandla le-semi-final yenkezo yeEasyCall. ITshilamoya yenelisa ukunqoba njalo iChicken Inn kumdlalo wamangqamu enkundleni yeBarbourfields.
► Ukuvuka kukaKnox Mutizwa. Umdlali lo ubeyinsika yeBosso kulisizini. Uqede ehlohle amabhola amanengi kulabo bonke kuligi yePSL. Phezulu kwalokhu, ngo2016 uzadlalela iBidvest Wits kweleSouth Africa.
► Charles Manyuchi. Lo ngumdlali we-boxing owenelise ukuphakamisa isizwe ngokugcina ibhanti lakhe le-WBC lightweight umhlaba wonke.
► AmaMighty Warriors ayakuma-Olympics ka2016 eRio de Janero, eBrazil. Ithimu yamantombazana enguqu adlalela isizwe aphumelela ukuyancintisa kulumkhosi wezemidlalo ohlanganisa amazwe wonke. AmaMighty Warriors enza imbali ngokuba liqembu lenguqu lakuqala kuleli ukuyadlala kumaOlympics.
Amantombazana akuleli kanye leBanyana yeSouth Africa yiwo amathimu amabili azamela iAfrica kulumkhosi wamaOlympics.
Kumkhankaso wabo, amaMighty Warriors azaqeqetshwa yingcitshi yenguqu yamantombazana uShadreck Mlauzi.
► Inkezo yeCastle ichapha uShangani. IChicken Inn yetheswa ubukhosi ngokuba yingqwele yenguqu eZimbabwe ngo2015. Intshantshu zeligi ephakemeyo lezi zizadlala kumkhankaso weCaf Champions League. Umdlalo wazo wakuqala zimelana leMamelodi Sundowns yaseSouth Africa.
► IBulawayo City ingena kuPSL. Iqembu elihlawulelwa yikhansili yakoBulawayo leli laqeda isizini ka2015 liyintshantshu yeligi ka-Division One kumhlubulo ongezansi yelizwe. Lokhu kutsho ukuba Amakhosi aseyingxenye yamathimu azancintisa kuligi ephakemeyo ngomnyaka ozayo.
► ITsholotsho FC isanda kuvuka ekufeni. Iziqholo zeZhwane zikwenzile okwakungacatshengelwa ngumuntu. Ithimu le, okuyiyo yodwa ebiphuma emaphandleni, yenelisa ukubambelela kuligi enkulu, ngomnyaka wokuchinsa ukudlala kuyo.
► Umdlalo wokugijima uthola usekelo. Kuyabongeka ukuthi umdlalo wokugijima koBulawayo usuthole usekelo njalonje kumankampani atshisekela ukuphakamisa ithalenta kulelidolobho. Sibonga usomabhizimusi uRaj Modi, iOld Mutual lezinye inhlanganiso lamabhizumusi asetshengisele ukuzimisela ekuthuthikiseni ithalenta lokugijima.
► UCuthbert Dube uphuma esikhundleni.
Le yaba yindaba eyakholisisa imuli yenguqu izwe lonke. Kwasekuhlale isikhathi kukhanya angathi uDube yindoda eyesabekayo. Inguqu yakuleli, ikakhulu ithimu yamaWarriors ibisiphenduke yaba yinhlekisa ngaphansi kobukhokheli bukaDube. Indoda le ibisibizwa ngokuthi ngu “Cashbert” Dube ngoba isebenzisa imali “yayo” ukubhadala indleko zamaWarriors.
Ukubusa kukaDube akuzange kube kuhle ngenxa yezigigaba zakhe zokuthola iholo eledlulisileyo, ukwanda kwezikwelede zeZifa, lokunye esingeke sakulandisa sakuqeda kuphephandaba. Okuhle kwaba yikusuka kwakhe esikhundleni, nanko sekulokukhanya kuZifa.
Okubi:
► Ukuvalelwa kwamaWarriors ukuncintisa kumkhankaso weWorld Cup ka2018. Ngenxa yokuvoxa udaka okwenziwa yibhodi yeZifa kanye lomkhokheli wayo.
► AmaChevrons ayangisa kakhulu. Iqembu lekhilikithi lenze ihlazo. Akula ngitsho lomdlalo owodwa onqotshwe ngabadlali besizwe. Kutshintshwe abaqeqetshi kwangena uDave Whatmore kodwa akulampumela ethokozisayo.
► Isimo somkhonomi sibuyelisa ingqubekela phambili kumidlalo yonke. Ukusilela kosizo lwemali sekudale ukuthi isizwe siswele ithalenta eliyilo kwezemidlalo. Lapho okulemali khona, isuka ibencinyane ingeneli ukusekela inhlelo ezikhona.
Okwamangalisayo:
► Ukukhethwa kukaPhilip Chiyangwa ukuba ngumongameli weZimbabwe Football Association.
Okwamangalisa kakhulu, kwethusa abanengi yikubika kukaChiyangwa ukuthi ufuna ukungena kukhetho. Ukunqoba kwakhe kwatshiya ihlekana labadlali abathize libambe owangaphansi ngoba bengacabangeli ukuthi u “Bla Phidza” uzayibamba intambo yeZifa.
Ngokungena kwakhe, uChiyangwa uhle waqala ukudinga imali yokubhadala isikwelede seholo likaTom Saintfiet, owayengumqeqetshi wamaWarriors.
► Ukuqhatshwa kukaBongani Mafu ukuthi aqeqetshe iHighlanders. UMafu waphiwa umsebenzi phambili kwabanye abaqeqetshi okwakuzwakala ukuthi bayazi inguqu ukwedlula yena. Bamangala abalandeli lenkokheli zeHighlanders bebona ukuthi ithimu ingaxotshwa kuPSL ngoba isidlalela phansi kwengalane.
