uMthunywa
Vusumuzi Ndlovu
SIYALAMUKELA kuMbimbitho wempumelelo. Kuliviki sibuka imisebenzi yabaculi esikhona esilindele nje ukuthengwa lokulalelwa ngumphakathi emisakazweni.
Siqale ngoPolite Tichivangana Sithole, odume ngokuthi nguP2DaOh opheke ingoma ezintathu esebenzisana labaculi abatsha abafana loDJ Prince Esikhosini, u-Uncle P loVerbz besungula ingoma zemihlobo etshiyeneyo zeAfrobeats, Amapiyano leminye ese Mo life Studios koNtuthu.
Ingoma kaDJ Prince Esikhosini uSiphuza Noma Yini elo Inno Endless yasungulwa emavikini amabili adluleyo eBAC Leisure, njalo yemukelwa ngentokozo. U P2DaOh loEsikhosini baphathisana ekusebenzeni lengoma, njalo kukhangeleka kuleminye imisebenzi esingayikhangelela kubo bobabili besebenzisana ngokufanayo.
Idlalade likaDJ Wexey uHumble Beginnings selisunguliwe ngokusemthethweni. Ngokulalela idlalade lonke, ngingafakaza ukuba uDJ Wexey ubonisa ukukhula lobungcitshi, njalo kuzwakala ukuba uthethe isikhathi sakhe elisebenza. Lelidlalade seliqalile ukungena emsakazweni ngengoma yakhe yakuqala uLuthando elentokazi uMulla. UMulla ukhona njalo kungoma yokholo uLord I Praise You.
Ezinye ingoma ezikuleli dlalade zibalisela uPaparapa Bye elembongi uSpinx, uShikisha eloMJ Sings, uJust eloKidd Eggo, Khoi Khoi, Terry Chizboi loSir Palmer. Uhlobo lwe-house music alupheke kulelidlalade lujulile, njengakuSweet Sensation eloNadine, Better for Worse eloGugu, lakuWakamirirei eloLalla eseMelowex Studios.
UAfrika Monate ithakazelela ubuntu lentombi zethu ngomculi wohlonzi uWillis Wataffi owe-Afrika Revenge, etshengisa ubuciko bakhe obungapheliyo esukumisa abasakhulayo okuyikho okukhuthaza ukuba umculo ukhule kuleli.
Siqhubeka ngemisebenzi kaPolite, usungule ujaha omutsha uUncle P, ehambisana loCrucifix engomeni ethi My Chocolate. Ingoma le imayelana lojaha osezimisele ukusa uthando lwentombi yakhe kuzinga elimqoka, umtshado. Lapha utshela omalume bakhe ngesifiso sakhe ngesithandwa somoya wakhe. UCricfix ungena ngamabala ahlakaniphileyo egcizelela ngemizwa kaProsper (Uncle P).
Sisabambe njalo ngoUncle P loCrucFix, bakhona njalo kungoma kaVerbz elungiswe nguP2DaOh ethi Noma layo imayelana lezothando. UVerbz usebenzisane leKasNoValo Entertainment ekaPOZee ukusabalalisa ingoma le. Halala Majaha, Imisebenzi iyabonakala!
