Duku duke I-Esperance eMagumeni

Duku duke I-Esperance eMagumeni

0 97
Norman Mapeza

Bongani Ndlovu

ISIFISO sentshantshu zenguqu yakuleli iFC Platinum sokusebenzisa inkundla yeMandava mhla bedibana leqembu leTunisia iEsperance kumqhudelwano weConfederation of African Football (Caf) asifezekanga.  

ICaf yalile ukuthi umdlalo wangoMgqibelo phakathi kwamaqembu la womabili udlalelwe eMandava, kungakho usuzadlalelwa enkundleni yeBarbourfileds.

Iqembu le-Esperance elacina ukubuya kweleZimbabwe ngomnyaka ka2003 lapho elaba ngutshiki lobhanqa leqembu leHighlanders, lizadibana leFC Platinum kuhlandla lesibili kumdlalo wabo wamaqoqo.

Kumdlalo wangoMgqibelo iFC Platinum izadlala ijonge ukuphindisela ngemva kokubhuqwa 2-0 ngenyanga edluleyo khonale eTunisia.

Isikhulumi seqembu leFC Platinum uChido Chizondo ubike ukuba umdlalo wala amaqembu amabili uzadlalelwa eBarbourfields koBulawayo njalo linkundla isisiba likhaya labo.

“Umdlalo wangempelaviki uzadlalelwa enkundleni yeB/F ngemva kokuba inkulumo zokudlalela eMandava leCaf ziwele phezu kwedwala kodwa asidananga kangako ngoba iBF sesiyiphatha njengekhaya lethu,” kuveza uChizondo.

Uqhubekele phambili waveza ukuthi iqembu selilolonge laphelela njalo lizimisele, ukunqoba abakudingayo nje lusekelo kubalandeli babo ukuthi babuye ngobunengi eMagumeni.

“Njengeqembu sesiwulungele lumdlalo wangempelaviki, silokukhulu ukuthokoza ngethuba esibe lalo lokudlala lengcitshi ze-Africa njalo sithanda ukunxusa abalandeli bethu ngobunengi babo kumdlalo wethu wokucina weCaf ngaphambi kokuqala kwesizini entsha,” kuchaza uChizondo.

Ugcizelele ngokuthi imidlalo le ibe lusizo kubo kakhulu ngoba beyisebenzise njengendlela yokufunda njalo lokukhula njengeqembu.

“Iloba singenzanga kuhle emidlalweni yale isizini yeCaf imidlalo le esiyidlalileyo ibe lusizo kithi ngoba kube lithuba lokuthi abadlali labaqeqetshi bathole ithuba lokukhula lokufunda okunye okutsha okwamanye amazwe njalo silethemba lokuthi singathatha lezizifundo sizisebenzise ngesizini yePSL ebuyayo kungasiphathisa ukuthi senze kuhle futhi siphinde sibuyele kuCaf ngomnyaka ozayo,” kuphetha uChizondo. 

SIMILAR ARTICLES

NO COMMENTS

Leave a Reply