uMthunywa
Musa Janga
UKWEHLULEKA ukusebenzisa umvundiso wefethalayiza kulakho ukubangela ukuthi umlimi athole isivuno esincinyane kukanti ubelakho ukuzitshayela inala.
UMthunywa ukhulumisane loMnumzana Mandla Ndebele we-Agro Seeds and Chemicals obike ukuthi umvundiso wefethalayiza uyaphathisa ekukhuliseni kuhle ezilimo nxa kuyikuthi usetshenziswe ngendlela eqondileyo.
“Abanye abalimi basuka basebenzise ifethalayiza ngendlela engaqondanga okwenza isivuno sehle. Kulemihlobo yamafethalayiza ehlekuneyo njalo yonke ilomsebenzi wayo. I-Compound D ngeyokukhulisa isilimo njalo umlimi nxa eyifaka lifethalayiza kumele afake eneleyo ngoba engadlulisa isilimo siyatsha,” kuchaza uMnu Ndebele.
Ubuye wathi okunye okuqakathekileyo nxa umlimi efuna ukusebenzisa ifethilayiza kumele aqale akhangele ukuthi izulu lingakanani.
“Nxa izulu lililutshwane akudingeki ukusebenzisa ifethalayiza ngoba yona vele ifuna lapho okulezulu elinengi ukuze ivikele izilimo zingatoti.
“Ifethalayiza ingafakwa izulu lililutshwane umhlabathi uyafa ngoba uyoma qha, lokhu-ke besekuphambanisa izilimo,” kulandisa uMnu Ndebele.
Uphethe ngokuthi uhlupho yikuba abalimi bagijimela ukufaka ifethalayiza bengelaso isiqiniseko ngokusebenza kwayo.
“Njengoba sitshilo phezulu ukuthi ifethalayiza ilalapho esebenza khona kuhle ngakho umlimi engehluleka ukuyisebenzisa kuhle kungamphambanisela izilimo zakhe acine engatholanga isivuno,” kuphetha uMnu Ndebele.
