uMthunywa
Isihloko: Blessings
Umculi: Lady Eef
Vusumuzi Ndlovu
ELIZWENI lethu kulezinsuku esinye isiqokoqela senguquko ezikhangelelweyo kakhulu yikusukumisa abesifazane ekuphathiseni kumkhonomi welizwe. Ngokufanayo, emculweni kumele kube njalo.
Ngikhuluma nje kungenzakala ukuthi usukhumbula abantu abafana labo Skhu, Sandra Ndebele, Lady Thug, loba uBeautiful Diamond. Kulezinsuku, kulo-AWA, TKP, Nkwali, RudoAmor, Paulla Palloma, iqembu leNobuntu, labanye abanengi. Ngokunjalo, uFaith Maviza wathi laye ngeke asalele. Usengenile ku-hip-hop yakoBulawayo ngedlalade le-mixtape, elithi Blessings.
ULady Eef ucindezele idlalade lakhe eliveza imizwa ehlukeneyo khona lapha koBulawayo. Uhlanganisa isiLungu lesiNtu ngokuhlakanipha esethula imizwa yakhe ayilobayo ngephimbo lakhe njalo lokuba yimbongi ye-hip-hop leRnB.
KuBlessings ukhuluma ngezibusiso zakhe kuhambo lwempilo. Ukubeka sobala engomeni zakhe echaza ukuba bekungekho lula ukuba aqhube umculo engowesifazane. Uke wephulwa umoya wazisola kwezinye izifundo, kodwa ubekezele wafunda izifundo ezinengi.
Uchaza kuFace Down ukuba uthando lolo asefuna ukuphuma kulo lumvule amehlo. Ukhuluma lesoka lakhe elazisa ukuba yena sehamba ngoba ngeke amele ukuhlukunyezwa loba emthanda. Ukhetha ukuba kungcono behlukane, kodwa uyambonga ukuba lokhu kube yisifundo kuye.
Uqhubeka etshengisa ubungcitshi bakhe ku-Its All Me, uthi kaboni omunye la ame khona. Kulingoma uncediswa nguFrost laye ongena ngamazwi akhe ahlakaniphileyo egcizelela ukuba abala bancintisi kulumhlobo wengomo we-rap. ULady Eef usuka kumbali yomculo ngekhaya, kuyabonakala lapha esekelwa ngumfowabo uHP kungoma ethi Ziyang’bandezela.
Lapho ukhuluma ngobunzima adibana labo ekwenzeni izinto zakhe empilweni. UHP uyangena emqinisa umnawakhe ukuba kuzalunga njalo etsho ukuba izitha zakhe ziyambandezela, kodwa ngeke ayekele ukuqhubeka ngakwenzayo ngomculo wakhe. Uthi ngoba uyazi ukuba yikho lapho athola lezo zitha njalo ngeke abanike ithuba.
Ku-Inspiration ukhuluma ngendlela abantu abadinga ngayo ukukhuthazwa ukuba beqhubeke ngempilo.
Ekukhulumeni laye uFaith, yena eyakhe inkuthazo uyithola emculweni, yikho la aziduduza khona kukho konke, njalo lapho athola khona idlabuzane lobuciko bomculo awenzayo. Kuyathokozisa ukuba bakhona abesifazane abalesifiso lethalenta lokucula elingancintisana labesilisa. Silitshayela ihlombe bomama labodadewethu njalo silikhuthaza ukuba liqhubeke ngemisebenzi yenu, ngoba liyabonakala. Ngokunjalo siyakujabulela Lady Eef!
