uMthunywa
ZIYEHLA ziyatshelela indaba zikaMthunywa kuliviki nanko phela sidibana lembongi yeMpopoma zaseVitoli ehaya enkundleni kukhale imvokloklo amadoda avume ngekhanda omama batshaye umpululu ngokujabula kuphela.
Nansi ingxoxo eqhutshwe phakathi kwembongi uObert Dube (OD) lentatheli uEthel Ncube (EN).
EN: Sitshele ngamafitshane ukuba wena ungubani, udabuka ngaphi njalo wenzani?
OD: Ibizo lami nguObert Dube ngazalelwa ekhaya emkulwini eLupane eDandanda ngomnyaka ka1984. Mina umsebenzi engiwenzayo ngowenkondlo njalo okwenza ngathanda lokhu yikuthi ngaphupha ngiqhutshelwa ugwalo lwenkondlo kudala.
EN: Uqale nini ukwenza inkondlo?
OD: Ngiqale ukwenza inkondlo ngisesemncane ngo1993 ngibukele inkomo zisilwa ekweluseni ngahle ngaqalela khonapho. Esikolo ngikhule ngiphatheka kakhulu kwezenkondlo.
EN: Inkondlo zakho ziphathelane lani?
OD: Inkondlo zami ziphathelane ngohambo lwempilo engaluhambayo. Empilweni akulanto ehlala ikhona konke kuyedlula ukuhlala kuhle kuyedlula ukudubeka lakho kunjalo.
EN: Uzulu uyawuthakazelela yini umsebenzi wakho?
OD: Abantu bayawuthabela kakhulu umsebenzi wami uhle, uzwe ngokhwelo nxa ngingena okutshengisa ukuthi abantu bayawuthanda.
EN: Sowathola izicoco ngaphi njalo yiziphi indawo osuke waphatheka kuzo ngenkondlo zakho?
OD: Ngo2016 ngathola isicoco kumaNama Awards, ngo2017 ngathola isicoco eSwaziland. Indawo esengike ngahaya khona kwavuma amadoda ngezibalisela iSwaziland, Namibia, Botswana, leSouth Africa.
EN: Ulamadlalade amangaki enkondlo zakho?
OD: Sengipheke amadlalade amane.
EN: Nhlupho bani ohlanganana lazo emsebenzini wakho?
OD: Inkondlo azitholi ukusakazwa kuhle emisakazweni njengengoma, siyafisa lathi ukuthi zizwakale kumisakazo enjengaboSkyz Metro kodwa ukuthola ithuba elinjalo kunzima. Okunye njalo umuntu uyacela ukuba umthumele inkondlo usebenzisa imali yakho manje ukuphathisana kuyabe kungaphi lapho? Abanye abantu bayangicela ukuba ngibuye emicimbini yabo ngizohaya, sengiqedile abasalethi mfanelo zami.
