uMthunywa
Ncekwenhle Ncube
KUZABE kungabizwa ozwayo eCity Pool kusukela lamuhla kusiya ngeSonto mhlaka 19 lapho okuzabe kuhlangene khona amazwe angu-13 kumncintiswano wokubhukutsha.
Kumncintiswano lo oweConfederations of African National Association kuzabe kulamazwe agoqela iZimbabwe, South Africa, Zambia, Angola, Seychells, Mozambique, Namibia, Malawi, Uganda, Tanzania, Kenya kanye leBotswana.
Umkhosi lo kubikwa uzavulwa ngokusemthethweni nguMsekeli kaMongameli welizwe uKhomuredi Phelekezela Mphoko.
Emidlalweni le kukhona eyabantwana abaleminyaka ephakathi kwe-11 kusiya ku-12, abale-13 kusiya ku-14, abale-15 kusiya ku-16 kube labale-17 kusiya phambili. Imidlalo le iqalisa ngo-9 ekuseni malanga onke kanti njalo ilanga linye ngalinye kulemincintiswano emibili owekuseni lantambama.
UMgcinisihlalo weMatabeleland Amateur Swimming Board uNokuthula Cyprones ubikele intatheli ukuthi iqembu leZimbabwe lizenza konke okusemandleni alo ukuthi linqobe emincintiswaneni le.
“Iqembu lethu selizimisele ukuthi liqalise umdlalo njengoba iqalisa. Konke sekuphelelisiwe njalo lokukhetha abazasimela sesakwenza. Osekusele kuphela yikuthi sinqobe sisale lemendulo zethu.
“Thina sikhangelele ukuthi sizuze imendulo ezinengi njengeqembu leZimbabwe yikho nje sinxusa uzulu wonke ukuthi asukume azosekela iqembu lakhe ngesikhathi lidibana lamanye kwelakithi.
Iqembu leZimbabwe liqale ukulolonga kusukela ngoMpalakazi kumnyaka ophelileyo kuze kuzofika kuyonale inyanga.
Lokhu kuphe abaqeqetshi beqembu ithuba elaneleyo lokwenza amalungiselelo abo lamaqembu abo.
Intatheli ibikelwe ukuthi kuzabe kulemendulo ezizaphiwa intshantshu zokubhukutsha.
Onqobe bonke uzaphiwa igolide kuthi olandelayo aphiwe isiliva besekucina i-bronze.
Kubikwa uKhmrd Mphoko uzabe eloMphathintambo wezemidlalo uKhomuredi Makhosini Hlongwane.
