uMthunywa
Emmanuel Ndlovu
“Ngingumthembo ozithembayo. Idube elimthende elicecisa iganga, elabalekela amahanisi ekhaya langena izinanga. Lamatha phezu kwamadwala, amanzi ampompoza athi mpo mpo!”
Langamazwi okuzitema akaSithandazile Dube, ivithikazi esekufake ezokuhaya inkondlo koBulawayo kwelinye izinga lephezulu.
Limbongikazi yathwetshulwa yingwe kuminyaka engu-33 edluleyo khonalapha koMfaz’utshay’ indoda iloba yakhulela khonale emaguswini eNkayi.
Lumdlali usedume okumangalisayo ngesiphiwo sakhe sokuhaya inkondlo kukanti abanengi bayake bambone kumikhosi emikhulu eyake iqhutshwe khonalapha elizweni.
Uyake abonakale futhi kumabonakude welizwe elingisa kumidlalo yokulingisa.
Ngaphandle kokwenza yonke le imicimbi, limbongikazi ingumbalisi esikolo seCowdray Park koNtuthu.
Ubuye abengumlobi wamabhuku. Ungezwa kabanzi ngalelivithikazi kungxoxo elandelayo ephakathi kukaEmmanuel Ndlovu intatheli ka-Mthunywa loSithandazile “Stha” Dube.
Ubuso bakho bujayelekile ukubonakala kumicimbi eminengi eyandise ukwenziwa elizweni. Ungathi fahla kancane ngembali yakho njengembongikazi.
Stha: Ngathwetshulwa yingwe khonalapha koBulawayo kuminyaka engu-33 edluleyo. Ngenza imfundo yami yesigaba saphansi esikolo seMagwegwe kwathi eyesigaba sesibili ngayenza esikolo seKukhanyeni Secondary eNkayi.
Ngiqeda lapho ngafundela ubutitshala kuzifundo ezibona ngezamabhizimusi lezi ezibizwa ngokuthi ngama-commercial subjects. Ngikhuluma nje ngingumbalisi esikolo se-Cowdray Park High.
Pho wabhudlukela kanjani kwezokudlala uyimbongikazi?
Stha: Kusukela ngisenza izifundo ze-primary ngangingena kumicimbi yesikolo ngidlala ngihaya inkondlo. Ngakhula laso lesi isiphiwo ngaze ngafika kuleli izinga engikulo lamuhla. Okunye mhlawumbe ngingathi kubangelwa yikuthi mina ngokwemvelo ngiyalawula.
Yiziphi indawo ezimqoka osuke wahaya kuzo inkondlo zakho?
Stha: Minengi kakhulu imikhosi esengike ngadlala kuyo elizweni. Lapha koBulawayo ngandise ukudlala emkhosini we-Intwasa Arts Festival, Ibumba International Arts Festival leminye imihlangano eyandise ukuqoqwa nguHulumende kanye lezinye inhlanganiso ezizimele zodwa.
Yiziphi indaba ojayele ukuzithinta kunkondlo zakho?
Stha: Ngandise ukuthinta izindaba ezihlupha umphakathi ezigoqela ukudlwengulwa kwabantwana, ukwendiswa kwabantwana, udlame phakathi kwabathetheneyo. Amalungelo abantu, ezothando kanye lokudumisa sibonga imsebenzi eyenziwa ngamaqhawe elizweni.
Uyimbongikazi ubuye ube ngumbalisi. Imisebenzi le yomibili uyihlanganisa njani?
Stha: Ngisebenza gadalala ukuze ngenelise ukuhlanganisa imsebenzi le. Ngilala phakathi kwamabili ngibuye ngivuke empondozankomo ngisebenza. Ezokuhaya inkondlo ngizenza kakhulukazi nxa sengitshayisile esikolo kanye langempelaviki kumbe ngekhefu. Futhi aziphambanisi ngitsho umsebenzi wami wokubangumbalisi.
Ngiyabona mpela ukuthi uhlala umatasatasa pho isikhathi sokuchitha isizungu lemuli yakho uyasithola na?
Stha: Ngiyasithola isikhathi sokuhlala phansi lemuli yami njengomama wabantwana ababili. Umkami uyangisekela kakhulu kulumsebenzi konke labantwabami. Esikhathini esinengi yibo abangiqondisayo endlini nxa ngilungiselela ukuhaya inkondlo zami.
Ukudlala uyimbongikazi kuyakudlisa na?
Stha: Ngisaqalisa eminyakeni edluleyo bengisadalala kodwa ngokubekezela khathesi sengiqalile ukuvuna izithukuthuku zami. Khathesi lamankampani lawo aseqalile ukungibiza kumicimbi yawo okuyikho okungijabulisayo ngoba sebebonile ukubaluleka kwemisebenzi yembongi emphakathini.
Ngaphandle kokuba yimbongikazi lokubangumbalisi kuyini okunye okwenzayo?
Stha: Ngingumlobi ngibuye ngibe ngumlingiswa. Ngomnyaka odluleyo ngaloba ibhuku elithi Around the fire njalo ngake ngadlala kumdlalo othi Choose Mazikhethela lothi Inhlanhla.
UStha sowake wayathokozisa abantu emazweni agoqela i-United Kingdom, South Africa, Botswana kanye leZambia. Kuwonalo umnyaka ubengomunye wembongi ezakhethwa kumkhosi we-National Arts Merit Award (Nama) kuhlandla lezimbongi iloba engasatholanga isicoco. Ngomnyaka ka2008 wathola isicoco sokwenza kuhle kumkhosi we-Ibumba International Arts Festival.
