uMthunywa
Ethel Ncube
Zisele zibambe owangaphansi izakhamizi zeNtalale eGwanda kuviki ephelileyo ngemva kokuba enye indoda ifake umkhwenyana wayo isandla kubangwa ukuthi kungani embiza ngebizo.
UMoses Sibanda kubikwa uwisele phansi umkhwenyana wakhe, uMnumzana Collen Nyoni ngempama wabona inkanyezi bevela khelela uMaGwebu belubhekise emizini yabo, uMthunywa ukuzwile lokhu.
Intatheli ixhumane lesinye isakhamuzi sakuleyondawo uMnumzana Lehatso Ndlovu ochaze ukuba lokhu kulwa kwababili kubaqede amathe.
“Mina kungimangalisile ukuba umkhwenyana ubengaze athole impama ngokubiza uyisezala ngebizo.
Uqhubekele phambili esithi “UCollen Nyoni uhlangane lembila zithutha ngokumemeza uyisezala ngegama lakhe,” kutsho uMnu Ndlovu.
Intatheli ixhumane njalo loMnumzana Moses Sibanda onguye otshaye umkhwenyana wakhe yena ovumileyo ethi ubemfundisa isifundo.
“Ukumtshaya ngimtshayile sibili ngoba wangimemeza ngebizo ekhatshana ngamkhuza wangiphendula wathi angithi ibizo ngelami ngihlutshwa yini? Ngacina ngimtshaya,” kutsho uMnu uSibanda.
Uphinde waveza ukuba uyaxolisa ngakwenzileyo ngoba bekumele bakhulume njengamadoda hatshi ukulwa.
Intatheli iyehlulekile ukuxhumana lalowo otshayiweyo uMnumzana Collen Nyoni ngoba kuthiwa kalaye umakhalekhukhwini, wagxotshwa yibhasi esethula impahla.
