Ezemidlalo

0 964

YiNtatheli kaMthunywa
UGATSHA lweSport and Recreation Commission lubika ukuba soluqede imali enengi lukhuthaza iziphathamandla zemidlalo etshiyeneyo ukuthi zikhuthalele ukuthola ulwazi kwezemidlalo.

0 977

YiNtatheli kaMthunywa
UKUNGAHLELEKI kwenhlanganiso yeZimbabwe Football Association sekuphazamise amalungiselelo eqembu lamaWarriors elizakuyancintisa kunkezo yeCosafa eSouth Africa ngeSonto.

0 962

YiNtatheli kaMthunywa
UMQEQETSHI weKaizer Chiefs Stuart Baxter uthe yena ungungqondongqondo weligi yeAbsa Premiership njalo uzitshayela izandla ngokudla ubhedu ngabadlali abakhethe kusizini esanda kugqitshwa lapho iqembu lakhe elihluthune inkezo.

0 1306

Nkosilathi Sibanda

UMARK Harrison kubikwa engabe elangazelela ukuqeqetsha iqembu leHighlanders kulandela ukuxoxisana kwakhe lezinye inkokheli zethimu le kunsukwana ezedluleyo.

Abafakazi abaqotho bancwebe uMthunywa indlebe ukuba uHarrison uke waxhumana lomgcinisihlalo weBosso uPeter Dube. UHarrison wayebalelwe kulabo ababekhangelelwe ukuqeqetsha iBosso kulisizini.

“UHarrison uyayifuna ithimu. Banengi abakwaziyo ngalokhu ngoba lomgcinisihlalo uluphethe udaba,” kubika omunye wabafakazi abaseduzane lenkokheli zeHighlanders.

NgoLwesithathu, uDube walile ukuthi kungaba lodaba olunje ngoba umqeqetshi wabo nguBongani Mafu.

“Ngeke ngitsho okunengi ngoba akulanto enjalo. Umqeqetshi esilaye, nguMafu (Bongani),” nguDube lo.
UMafu uhlalele evalweni okwamanje ngokwehluleka kweqembu kumidlalo edluleyo. Ekhuluma loMthunywa ngempelaviki emagumeni, umqeqetshi lo uthe ngeke asuke kuBosso okwakhathesi ngoba owakhe umsebenzi uwenza ngendlela efaneleyo.

Kulandela ukudliwa yiChapungu leCaps United abakhokheli be beBosso abasabuquthi ubuthongo ngoMafu.
“Ithimu ngiyilolonga ngendlela eyiyo njalo nxa sisiya emdlalweni labadlali bayazi ukuthi ngibalungise baphelela,” kutsho uMafu.

Udaba obelusegudwini yikuthi inkokheli zeBosso zithi zizamxotsha uMafu nxa engehluleka ukugcwalisisa isivumelwano sokwenza ngcono kumidlalo yakhe elitshumi kuhlandla lakuqala lesizini.

Njengoba sekusele imidlalo embalwa nje ukuthi kufike umdlalo wetshumi, uMafu ubhekane lenkalakatha yomthwalo wokuvusa lithimu.

Ekhuluma ezigqaja, uMafu uthe bekuyinhloso yakhe ukuthwala inkezo ezinengi ekuBosso.
“Abadlali bami bonke bakhangelele ukuphakamisa umdlalo wabo, akulula kodwa sizakwenza.

“Kukhona okuthile okumele kulungisiswe. Ngeke safuna ukuthembisa okunengi, kodwa sikhangele ukufinyelela inkezo ezikhona,” kutsho lumqeqetshi..

UMafu uphethe ngokuthi kafuni ukuvuma ukuthi uyehluleka ngoba umncintiswano wenkezo yeligi usavulekile.

0 1200

YiNtatheli kaMthunywa

INHLANGANISO yeZimbabwe Football Association (Zifa) isihlekela esikhewini ngokusekelwa yiFifa kuhlelo lokufundisa abaqeqetshi besifazane inguqu.

Lokhu kuze ngesikhathi iZifa ibhekane lenqwaba yenhlupho zemali, isehluleka lokubhadala abaqeqetshi kanye lokuqhuba inhlelo zokuthuthukisa inguqu.

Ngomzamo wokuphakamisa ubungcitshi abaqeqetshi benguqu yamantombazana umhlaba wonke jikelele, iFifa isivule isikolo sokufundisa labo abafisa ukuba ngabaqeqetshi bomdlalo.

Inhlanganiso yeZimbabwe Football Association iphiwe umlandu wokuthi iqalise amakilasi la. Kumbiko wayo othunyelwe iphephandaba likazulu, iZifa ngokuya kwesikhathi, kulabanye abazangena ekilasini mhlaka 11 kuMabasa kusiya ku15 enkundleni yeZifa Village eMount Hampden.

Abaqeqetshi abangamatshumi amathathu bazafundiswa nguJacqueline Shipanga ovela kwele-Namibia.
Kubikwa umaneja weFifa kwezokuthuthukiswa kwenguqu yamantombazana uMayi Cruz Blanco ucebise iZifa ukuthi isebenzelane loShipanga kuzifundo lezi.

Isikhulumi seZifa uXolisani Gwesela ubike kubulembu ukuba izifundo lezi zizanikeza abaqeqetshi ithuba lokuthi bakwazi ukuguquka kwenguqu.

“Silokuthaba ngohlelo lweFifa lokufundisa abaqeqetshi bethu benguqu yamantombazana. Izifundo lezi sikholwa ukuthi zizaphakamisa isisindo sokudlalwa kwenguqu yakithi.

“Sibonga iFifa kakhulukazi ngokusivumela lokusekela uhlelo lolu ngemali.”

UGwesela uthe umqondisi weSport and Recreation Commission uCharles Nhemachena uzavula ngokusemthethweni ukuqala kwezifundo.

“Umaqhuzu weZimbabwe Olympic uAnna Mguni laye uzakuba yingxenye yaloluhlelo ngoba uzagqiba ngokukhuluma labaqeqetshi abasezifundweni,” kutsho uGwesela.

Uluhlu lwabaqeqe abazafundiswa yiFifa:

Ivy Garikai (Coach, Tenax FC), Judith Lunga (Coach, Inline Academy), Nomsa Moyo (Coach, New Orleans), Tsitsi Shiri, Choice Chinyama, Dorothy Mugari (Coach, Rhinos Queens), Locardia Mugavazi (Coach, ZRP Queens), Melody Mutasa (Coach, Mufakose Queens), Lilian Masase, Ruvimbo Mutyavaviri, Manyara Mandara, Rutendo Pote, Hazel Mwendazviuya (Coach, Aces Academy), Gladys Bobo (Coach, Swallows), Tarisai Shereni (Coach, Black Rhinos), Margret Phiri (Coach, Children’s home), Chipo Muvavarirwa (Coach, Masvingo), Siza Khoza, Viola Ndlovu, Spiwe Hlongwani, Annacoletta Mweneziko, Saliwe Chifamba, Fungai Kombo, Ntomiyelanga Ndlovu, Faith Chasi, Grace Chinyama, Kudakwashe Basopo, Patience Matsara, Rejoice Zhanje loSandra Ngwenya.

0 1121
uDesmond Maringwa

YiNtatheli kaMthunywa
AMAQEMBU enguqu alomkhuba omubi wokuncindezela abadlali uma kusiza kwezemali azayifunda ivaliwe kulisizini, kutsho inhlanganiso yeFootballers Union of Zimbabwe.

Inhlanganiso le ekhangelane lezempilakahle yabadlali ibike ukuba izaqala ukudonsela amathimu kungatsha zomthetho nxa eqhubeka ngokuthathela phansi umsebenzi wabadlali.

IFUZ ithe sekusegcekeni ukuthi kulenkokheli ezidelela inhlanganiso yabo, okuyikhona okuzenza labo babophe imithetho ukuze abadlali bakhululeke.

UDesmond Maringwa, umgcinisihlalo weFUZ utshele uMthunywa kuliviki ukuba amathimu wonke akuleli asetsheliwe ukuthi atshiyane lokusebenzisa abadlali njengezigqili.

IFUZ ikhuluma kanje ngesikhathi amathimu ephezulu okuqedisisa ukuthengwa lokuthengiswa kwabadlali kulisizini.

UMaringwa ubike ukuthi inhlanganiso yabo ikubeka mgceke ukuthi nxa iqembu lingenza isivumelwano lomdlali kumele libone ukuthi liyasigcwalisa leso sivumelwano.

“Sikhuze amathimu la aqinisa amakhanda ngokungcindezela abadlali. IFUZ ilengqwaba zezikhalazo zabadlali abancitshwa imali. Sikhathazekile kulandela ukungabhadalwa kwabadlali ngamaqembu amanengi akuPremier Soccer League(PSL) kuleli.

“Sikubeka mgceke ukuthi nxa amalunga amabili enze isinqumo kumele asihloniphe leso sinqumo. Nxa kulobunzima sikhangelele ukuthi amalunga lawo womabili akhulumisane sobala, kulandela okulotshiwe kuleso sinqumo,” kutsho uMaringwa.

Kuzwakale ukuthi inhlanganiso ye FUZ isisebenzelana logatsha lukaHulumende olubona ngezisebenzi. Abadlali labo bakhuthazwe ukuthi kumele balandele indlela ezibekiweyo nxa bekhalala umsebenzi ukuze lomthetho ubavikele.

0 962

INDODA eyatshaywa nguFloyd Mayweather yetheswa icala lokuqamba amanga ngemva kokwehluleka ukubika ukuba wephuka ihlombe anduba angene esitikini.

UManny uzakhipha i$5miliyoni yokuxolisa abathandi bomdlalo we-boxing abalahlekelwa yimali yokubhadala ukubukela ukulwa kwakhe loMayweather.

Kusenjalo, inombolo ezikhitshwe ngobuchwephetshe beCompuBox ziveza ukuthi uFloyd Mayweather unqobe okwamampela empini ebukelwe ngabanengi enkundleni yase-MGM Grand Casino eLas Vegas.

UMayweather ubeke enyameni izibhakela ezingu-148 kwezingu-435 nxa kuqhathaniswa lezikaManny Pacquiao ophose ezingu-81 kwezingu-429.

Amajaji abenikezwe umsebenzi wokwahlulela impi le ebichazwa njengenkulukazi esike yaba khona eminyakeni elitshumi.UMayweather uqhubeke lerekhodi yokungahlulwa selokhu waqala ukujika ingqindi. Uselwe izimpi ezingu-48 wazinqoba zonke.

Umtshayisibhakela lo odume ngebizo elithi “Money” kubalandeli bakhe, uthe ukumelana lezibhakela zikaPacquiao bekunzima.

Ekhuluma ngemuva kwempi uthe nxa kuzamele kuliwe njalo, abalandeli abafunde ukubekezela. Uthe kumele kuhlelwe isikhathi esifika iminyaka eminyaka emihlanu bobabili besenkambeni yokulolonga. Ngalesosikhathi abahleli bempi yakhe loPacquiao bazabeka isivumelwano zokulwa kwabo.

UPacquiao ubezama ukuhlasela uMayweather ngezibhakela kodwa ubezivika okuyisikhali aziwa ngaso ezimpini azilwile phambilini.

“UManny Pacquiao uyalwa. Ngiyakuqonda kungani ebekwa phezulu esibhakeleni. Mina ngikhaliphile, ngiyakwazi ukuyifunda impi, ngilwe kangcono kulaye. Besikwazi okufanele sikwenze. Uqinile, kunzima ukulwa laye. Kudingeke ukuthi ngithathe isikhathi ngimbuke ukuze ngimfunde,” kutsho uMayweather.

UPacquiao uthe ulwe elimele ihlombe kodwa wathi ngeke avike ngalokho.

“Ngenze okusemandleni kodwa bekungenele,” kusho yena. UMayweather akazange ayingene leyo wathi naye ubelimele, wathi ukuba bekunqobe uPacquiao ubezokuhlonipha lokho. “Bengizothi, uyazi ukuthini, kumele ngihloniphe ngithi ubengcono kunami,” usho kanje.

0 919

YiNtatheli kaMthunywa
IQEMBU le-Unity Village FC selitshiyane lokudlala inguqu yobungane emahlangeni nanko selingene kuligi “engcono”, iBulawayo Amateur Football League (Bafa).

Besokuyiminyaka elitshumi ithimu yeUnity Village isadalala kumidlalo yobungane. Kumidlalo le abakhokheli balithimu babika ukuba bebengatholi lutho kukanti labadlali babo bebelahlekelwa lithalenta ngenxa yokudlalela kunkundla eziphansi.

Umanenja weUnity Village uMartin Chingono uthe iqembu lakhe lihlale okwesikhathi eside kunguqu yobungane ngakho sekumele liqale ukuncintisa kusigaba siphezulu.

UChingono uthe sebenanzelele ukuthi abadlali babo balesiphiwo somdlalo kodwa ababonwa muntu.

“Sesitshiyane lokudlala inguqu yobungane. Sidlala kuligi yeBafa khathesi ngoba inhloso yethu ngeyokuphakama siyeku-Division One kuminyaka emibili elandelayo.

“Inkokheli labadlali bethu bayavumelana ukuthi ukutshintsha iligi kuzanceda ngoba ithimu isizabonakala ukuthi ilethalenta. Abadlali bazathola amathuba, lethimu iphakamise ibizo layo lokuthuthukisa abalandeli.”

Umaneja lo uthe okubafuqele kuligi yeBafa yikuphumelela kweqembu lekhansili iBulawayo City FC. Iqembu leli selitshibilika ku-division1 ngemva kokukhukhula amanye amathimu enkundleni zika-division 2 ngomnyaka ophelileyo.

“Bakhona ababecabanga ukuthi asisoke sisuke kunguqu yobungane. Sesikwenzile lokho ngokungena kuBafa. Okwenziwa yeBulawayo City lathi sizakwenza,” nguChingono lo.

Kusenjalo uOmega Sibanda, umsekeli kamongameli wenhlanganiso yeZimbabwe Football Association (Zifa ukhuthaze iUnity Village ukuthi iqalise ukuzwisisa imthetho yenguqu njengoba isingena kumaligi alohlonzi.

“Kuyathabisa ukuthi iUnity Village isicabange ukuphakamisa umdlalo wayo. Ngicebisa ithimu le ukuthi izwisise okumunyethwe yimthetho yenguqu.

“Qhubekani ngokukhangelela phambili ukuze ithimu ifike kusibanga siphezulu somdlalo.”

USibanda, ohlonitshelwa ukuba ngumqali wesiziba kwezokuthuthuka kwenguqu koBulawayo, wayengomunye wenkokheli ezasungula amathimu anjenge-Unity Village.