Ezemidlalo

0 19
uTavengwa Mukuhlani

YiNtatheli kaMthunywa
UMGCINISIHLALO wekhilikithi, Zimbabwe Cricket (ZC) uTavengwa Mukuhlani ukweleNdiya lapho akhangelele ukukhulumisana labakulelo ngohambo lwamaChevrons okumele balwenze ngenyanga kaMbimbitho.

UMukuhlani uhambe lomele umqondisi weZC, uGivemore Makoni emhlanganweni lo lebhodi yekhilikithi kweleNdiya eMumbai izolo. UMkhokheli weZC lo uthe kuyimvama ukuthi ukuvakatshelana phakathi

kwamaqembu la womabili eZimbabwe leNdiya kuxoxiswane kumabhodi la.

Uhambo lweZimbabwe kwele-Indiya lusengozini ngemva kokwethulwa kwamalanga lapho okuzadlalwa khona i2019 Indian Premier League.

Iligi le ikhangelelwe ukuqhutshwa kusukela mhlaka 29 Mbimbitho kusiya kumhlaka 19 Nkwenkwezi ngenxa yemidlalo yendebe yomhlaba yekhilikithi i-International Cricket Council Cricket World Cup eNgilandi ezaqala mhlaka 30 Nkwenkwezi.

“Sizahlangana labakhokheli beBCCI ngoLwesithathu njengenjayelo. Akukho esingakwenza ngaphandle kokuthi sihlale phansi sikhulumisane ngohambo lolu,” nguMukhuhlani lowo.

Njengoba kukhangelwe ukuthi ilizwe le-Australia livakatshele e-Indiya ngoMbimbitho, uhambo lweZimbabwe kwele-Indiya lungaqunywa lube lufitshane.

Ilizwe leZimbabwe likhangelelwe ukuvakatshela kwele-Indiya ngenyanga kaMbimbitho ukuze kwenziwe ama-ODIs.

Bekulenhlelo zokuthi ilizwe le-Indiya libuye kuleli ngoba lokhu bekuzaphathisa iZC ngemali kodwa ngenxa yalokhu osekusenzakala ngeke kube kusenzakala.

0 7
Unozinti we-Orlando Pirates uBrilliant Khuzwayo okuvela ukuthi kafuni ukuphangisa ukubuyela ensimini kuze kube lesiqiniseko sokuthi usesilile ngokupheleyo loba odokotela besithi usengadlala

YIZE kukhalwa nxa zonke ngokuqhubeka lokungabonakali enkundleni kukaBrilliant Khuzwayo, okuthiwa usengcono kodwa umaneja wakhe uthi akukho okutshaya amanzi ngenhlalo lempilo yalo unozinti ku-Orlando Pirates.

Ngenxa yamaphutha onozinti bayo okubalwa kubo uSiyabonga Mpontshane, Jackson Mabokgwane loWayne Sandilands sekuholele ekutheni abalandeli bePirates babalisa ngoKhuzwayo ezinkundleni zokuxhumana.

Ngeshwa labo, lonozinti osayine kuPirates ngoNtulikazi, akazi lowodwa umdlalo osemthethweni kuPirates ngenxa yokuthi walimala kubi ejimu (gym) kusalungiselelwa ukuqala kwesizini ka-2018/ 2019.

NgoMpalakazi kuvele ukuthi usengcono nanko phela useke wahlala ebhentshini, kodwa kakaze adlale kuze kube khathesi.

Ubhule umlilo kuTwitter esithi kajahanga ukubuya ngoba kafuni ukwehlelwa ngenye ingozi ngoba ephange wangena enkundleni.

LoBasia Michaels, weQT Sports okuyinkampani eyengamele izindaba zakhe, ugcizelele ukuthi asikho isikhalo asebeke basithola kuKhuzwayo ngokungadlali kwakhe.

“Ngabe ngiqamba amanga uma ngithi kukhona esesike sakuzwa mayelana lokuthi udlala nini. Empeleni kajahanga ukudlala ngoba ufuna ukusila ngokugcweleyo.

“Esikwaziyo yikuthi akakazizwa kahle. Mayelana lokuthi ukuliphi izinga lokusila, ngeshwa asikwazi ukuphawula ngalokho. Yizindaba ze-Orlando Pirates lezo ezingahlangene lathi. Ngodokotela bayo abanganikhanyisela. Hayi kabi,” kutsho uMichaels.

Lona ngeminye yemiqhudelwano ebalulekileyo kusihlalo we-Orlando Pirates, angajabula ukuthi leliqembu lithi ligubha iminyaka engu-82 lasungulwa angajabula ukuthi ethi egubha leminya libe liqhuba kahle kwiChampions League.

Ukulimala kuka-Itumeleng Khune oyisethenjwa ezimbangini zePirates, iKaizer Chiefs kanjalo lakuBafana Bafana, kusenze sabasikhulu isikhalo ngokungadlali kukaKhuzwayo.

UKhune useyoze abonakale ngomnyaka ozayo okutsho ukuthi akazukubakhona emdlalweni omqoka weBafana wokuhlungela i-2019 Africa Cup of Nations leLibya ngoMbimbitho.

IBafana idinga iphuzu ukuze idlulele ku-Afcon ese-Egypt ngoNhlangula. Layo i-Afcon uqobo uKhune ngeke ayidlale kwazise ngemva kokuhlinzwa ngoLwesithathu kuvele izindaba ezithi uzohlala izinyanga eziyisithupha engadlali.

UKhuzwayo utshiye kuChiefs ngoba ebalekela ukukhuhliswa ibhentshi nguKhune. Wathi kungcono aye lapho azadlala khona ukuze abange ijezi leBafana loKhune.

Lo nozinti waseMlaza efika kwiPirates uthe ufuna ukulandela ezinyathelweni zikaSenzo Meyiwa ngokuba yidwala ezintini zePirates.

0 6

YiNtatheli kaMthunywa
IQEMBU leHighlanders likhangelele ukuqhatsha abadlali abathathu abazagijimela ezikaMagebhula kusigaba sika2019.

Umgadli weZambia uPeter Nyirenda, 21, ukhangelelwe ukuqalisa ukulolonga labadlali beBosso ekupheleni kwayonale iviki.

UNyirenda ubedlalela iqembu leNew Monze Swallows kusizini ephelileyo njalo uke walolonga labanye abadlali beBosso mhlaka 5 lo 6 Zibandlela eCrescent Sports Club.

Umqeqetshi weBosso uMadinda Ndlovu uthe: “Ngasungula uhlelo lokulolonga lolu ngenhloso yokuthi sibone abadlali esibafunayo. Ngangingeke ngithi umdlali lo abuye yedwa azololonga.

Ngaphandle kukaNyirenda, iBosso ikhangelele ukwamukela njalo umgadli weAces Youth Soccer Academy oleminyaka engu-20, uRussell Chifura.

Umqeqetshi lo usenikeze uluhlu lwabadlali afuna babe yingxenye yeqembu lika2019 kubakhokheli beBosso ukuze kuvalwe izikhexe zabadlali abahambayo.

UChief Executive Officer weBosso uNhlanhla Dube uthe: “Sizama ukulandela ezinye inhloso zethu ezintathu ezilethwe yilabo ababona ngabadlali. Sizakuba sesimeni sokukhuluma ngalokhu nxa sokulamagama sesenze izivumelwano zaphela zonke. Okwakhathesi konke ngumsebenzi olokhu usaqhutshwa.”

EzikaMagebhula zilahlekelwe ngabagadli ababili uNewman Siachali kanye loGabriel Nyoni abaya kuqembu leCaps United kanye loHonest Nyoni okulokhu kungakaziwa ukuthi useyedlalela liphi iqembu.

Kusenjalo iqembu leli lenelise ukugodla abanye abadlali balo abaqakathekileyo ababalisa unozinti walo uAriel Sibanda owathatha isicoco sokuba ngunozinti obambe ukwedlula bonke esePremier Soccer League’s Goalkeeper of the Year Award.

IBosso yenelise njalo ukugcina uPeter Muduhwa owala ukuya kuqembu leChicken Inn leleNgezi Platinum Stars kanye loTendai Ndlovu.

0 17
Philemon “Chippa” Masinga

KUTSHAYEKE leqembu laseNgilandi elidumileyo kuleliya lizwe iLeeds United ngokuvela kwezindaba zokudlula emhlabeni kukaPhilemon “Chippa” Masinga owazakhela olukhulu udumo eqhulula amagoli emaqenjini amanengi akuleli lawaphetsheya kwezilwandle.

UMasinga, odlule emhlabeni izolo eleminyaka engu-49 ubudala ngemva kokugula isikhathi eside ephethwe yisifo esingazange sivezwe, wayengagcini ngokuwaqhulula kulamaqembu ahlukeneyo khepha lakuBafana Bafana ubesenza okufanayo.

UMasinga ubengeniswe eTshepong Hospital eseKlerksdorp kodwa waphinde wadluliselwa eParktown Hospital lapho atshonele khona.

Uhamba emhlabeni nje, inkalakatha yeshoti ayitshaya iBafana Bafana ibhekane leCongo-Brazzaville ngo-1997 isesezingqondweni zabathandi bakanobhutshuzwayo kuleli kwazise yilo elenza owayengumqeqeshi, uClive Barker, wandizisa okwendizamtshina ekhombisa ukuthi siyaya eFrance lapho okwakuzodlalelwa khona iNdebe yoMhlaba okokuqala ngqa kukhona leNingizimu Afrika ngo-1998.

ILeeds uMasinga adlale kuyo ikhale kakhulu ngokutshona kwalumdlali abasamchaza njengomuntu olilunga lomdeni wabo. Ngalesi sikhathi uMasinga wayedlalela iqembu elilodwa loLucas Radebe.

“Kusethusile futhi kusitshayile ukuzwa izindaba ezimbi zokutshona kukaPhil. Singumdeni kuLeeds ngakho-ke okwehlele umdeni wakoMasinga kuyafana lokusehleleyo. Njengamanje sicabanga ngokukhulu ukujula ngaye lomdeni awutshiye ngemuva,” sitsho kanje isitatimende saleli qembu uMasinga alidlalele kusuka ngo-1994.

Ngemva kokudlala kahle kuLeeds lapho ayesayiniswe khona uHoward Wilkinson utshiyile waya kuSt Gallen yaseSwitzerland. Kahlalanga lapho wadlulela kuSalernitana leBari yase-Italy.

Udlalele iBafana amahlandla angu-58 watshaya amagoli angu-18. Umongameli weSouth African Football Association (Safa), uDanny Jordaan, uthe amancoko yiwona azomkhumbula ngawo uPhil.

“Lusuku olubi lolu ebholeni laseNingizimu Afrika. Ubemnene futhi ezimisele ukwenza noma yini ukukhulisa unobhutshuzwayo okuyinto abeyithanda kakhulu. Ubeyisibonelo ephakathi enkundleni yiloba ubesephandle kwelizwe bekuyinto efanayo,” kutsho uJordaan.

“Kulula kuleli ukuthi umuntu abizwe ngenkakha kodwa uPhil ubengeyona inkakha kithi sodwa khepha ubenjalo lasemhlabeni wonke jikelele. Akasekho. Alisekho iqhawe lethu. Akukuhle lokhu kodwa ngoba kuyintando yoMdali sithi kulungile. Silahlekelwe sonke kodwa umdeni wakhe lebhola laseNingizimu Afrika kutshayekile,” kutsho uBhuddha Mathathe weSouth African Masters and Legends.

“Kubuhlungu ezinhliziyweni zethu ukuthi sivuka ngezindaba ezimbi kanje. Siyohlala simkhumbulela into eyodwa uChippa, ukuqhulula amagoli,” sitsho kanje isitatimende sePSL.

UMasinga udlale emazweni abalisela i-England Switzerland lase-Italy kanti emaqenjini udlale kuMamelodi Sundowns Leeds United Jomo Cosmos ukukha nje phezulu.

Ubeyingxenye yeBafana elethe injabulo esizweni sonke ngo-1996 idlela ekhaya isicoco se-African Nations Cup (Afcon).

— Isolezwe

0 23

YiNtatheli kaMthunywa
INHLANGANISO ebona ngezemidlalo kanobhutshuzwayo kuleli iZifa isiyethule umbiko wokubonga abalandeli ababesenkundleni yeBarbourfields ngoMgqibelo.

Umdlalo weFC Platinum kanye leOrlando Pirates weCaf Champions League obuseMagumeni ngoMgqibelo ubukelwe ngabantu abedlula i-23 000.

Kubikwa kulabantu abangu-23 164 ababhadala ukungena enkundleni le ukuze babukele umdlalo weFC Platinum kanye leOrlando Pirates okuyikho okwenza iZifa yethule isibongo lesi.

“NjengeZimbabwe Football Association sithanda ukubonga kakhulu abasekeli bethu ngokubuya enkundleni yeBarbourfields ngobunengi babo ukuzobukela umdlalo phakathi kweqembu lakuleli iFC Platinum kanye leOrlando Pirates ngoMgqibelo.

“Lo ngumdlalo ozahlala ukhunjulwa ngabanengi nanko phela inkundla yeBF yayigcwele phamu. Kuqakathekile ukuthi lazi ukuba njengenhlanganiso emele ezemidlalo kuleli siyajabula kakhulu ngendlela iFC Platinum edlale ngayo.”

Kusenjalo iZifa ixolise abalandeli bomdlalo webhola ngengxabangxoza eyenzakala mhla kudlala iFC Platinum kanye leOrlando Pirates.

Umdlalo lo owagcwalisa phamu inkundla yeBF ngababukeli kanye labanye abahlonitshwa ababenxusiwe abagoqela uMsekeli kaMkhokheli weZifa uGift Banda, owayengumdlali weqembu lesizwe umgadli uBenjani Mwaruwari, uMgcinisihlalo wamaWarriors uWellington M’padare kanye labanye abeqembu leFC Platinum bathwala nzima ukuthi bangene enkundleni.

Kulabanye ababelamatikiti amaVIP kanye lamaVVIP ababiselwa emuva ngoba sekugcwele enkundleni.

Kumbiko okhitshwe ngabeZifa ngoLwesibili kuyonale iviki, iZifa ixolise ngokwenzakala enkundleni andubana bakhuthaze ababukeli ukuthi baphangise ukufika enkundleni nxa kulemidlalo.

“Inhlanganiso iyakwazi okwenzakalayo ekungeneni enkundleni yeBF okwabangela ukuthi ababukeli abanengi baphuze ukungena. Siyaxolisa kibo bonke abathwala nzima.

“Siyathembisa ukuqhubeka sisenza konke okusemandleni ethu ukuthi kuthuthukiswe ukulungiselelwa kwemidlalo. Ngasikhathi sinye sithanda ukucela bonke abathintekayo ukuthi baphangise ukufika enkundleni ukuze bangadani,” kutsho umbiko weZifa.

IZifa ithe idaniswe ngabalandeli abalutshwana abacine bephosa izinto enkundleni.

0 121
Abamele iEgyptian bami lefulegi yabo ngemva kokunqoba ukuphatha imidlalo ye2019 Africa

IZWE lase-Egypt lizosingatha imidlalo ye-African Cup of Nations ezoqala mhlaka 15 ngoNhlangula kusiya ku-13 Ntulikazi. Lezi zindaba zimenyezelwe umongameli weConfederation of African Football (Caf) u-Ahmba Ahmad ngoLwesibili eDakar, eSenegal.

0 119

Nkosilathi Sibanda

IQEMBU lomdlalo we-basketball kuleli kubikwa lizakuyancintisa kwele-Botswana kumqhudelwano wohlelo lwe “3 on 3”  oludibanisa amazwe ayisitshiya galolunye.

0 130

YiNtatheli kaMthunywa

INHLANGANISO yeBulawayo Athletics Board (Bab) isiphiwe ithuba lokuqoqa imincintiswano yemijaho emide yalonyaka njalo kulandela ukuqhuba kuhle umbuthano womnyaka odluleyo enkundleni zesikolo seLuveve High.

0 155

Nkosilathi Sibanda
KUZAKHANYA ukuthi kungani inengi labalandeli bebhola kulumhlubulo welizwe bethanda iOrlando Pirates ukwedlula wonke amaqembu mhla abadlali beBhakaniya bengqikilana le-FC Platinum yakuleli kumdlalo we-Champions League eBarbourfields ngoMgqibelo.

Akubizwa ozwayo njalo akula ongaziyo ukuthi kusukela kuzitanda zeSoweto kulinkundla kuze kuyebamba laseMpankweni kubhode lakuVIP kuzabe kumnyama tshu kugqokwe izikipa ze-Orlando Pirates.

Sebekubeke sobala abalandeli benguqu koBulawayo, ikakhulu abeHighlanders ukuthi bazagcwalisa inkundla yabo bejonge ukusekela iBhakaniya ngoba kuliqembu elisenhliziyweni zabo.

Abanye bathe iPirates “ingumfowabo” weHighlanders yikho bengeke basekela intshantshu zakuleli iFC Platinum.

Iphephandaba likazulu lixoxe lenengi labasekeli benguqu koBulawayo lakwezinye indawo eziseduzane.

Kuvele ukuthi bambalwa abavuma ukuthi bazabukela lumdlalo befuna ukuthi kunqobe izimbamgodi zePlatinum.

“Izaphenduka ibemnyama inkundla yeBarbourfields ngoba silande ukubabukela abafowethu iOrlando Pirates. Asikhethi mhlobo kodwa yimvelo ukuthi umuntu ozazi esekela iBosso asekele leOrlando Pirates.

“Sihlala lapha kodwa leli liqembu esilazi ukwedlula wonke. Angeke kumangalise ukuthola ukuthi abanye bethu abadlali beBhakaniya sibazi ngcono ukwedlula abakuleli. Ngakho-ke ayihlome ngoMgqibelo thina sizakhuza esiyaziyo,” kutsho uMziwethu Nyambosi umsekeli weHighlanders kuBulawayo.

Umsekeli weHighlanders olodumo ezitaladeni zakoNtuthu obizwa ngokuthi nguTeekay uthe kuzakubanzima kuye ukuthi asekele iFC Platinum loba kuyikho okumele akwenze.

“Njengomuntu ozelwe eZimbabwe, osekela inguqu yakuleli, kuzamele ngisekele iFC Platinum kuze kuse. Inkinga ekhona luthando lwami lwe-Orlando Pirates, luvela khatshana. Ngigqoka imbala yalithimu ngiphinde ngihlabele ingoma zayo ngoba iseduzane leBosso. Pho ngizakwenzani ngoMgqibelo?”

Loba inengi lizasekela izethekeli, umhlonitshwa kwezokusekelwa kwebhola koBulawayo uNkululeko Tshambo uthe yena uzakhuza iFC Platinum.

UTshambo uthe ukusekela iFC Platinum ukuze inqobe kuzaletha inzuzo enkulu kakhulu kumdlalo kanobhutshuzwayo wakuleli.

“Umdlalo lo uzakubamnandi kakhulu. Ngizasekela iFC Platinum loba lonke lisazi ukuthi ngingoweBosso ngomdabu. Ngilezizatho ukuthi kungani ngizasekela iPure Platinum Play.

“Okwakuqala, sinanzelele ukuthi ukunqoba kwe-FC Platinum kuzaphakamisa inguqu yethu, kuvulele amathuba abadlali. Ukunqoba kwayo kuzaletha lemidlalo yaphezulu eminengi edolobheni lakoBulawayo.

“Kunzima ukuthi sibukele imidlalo enje kulumhlubulo ngakho ngiyayibonga iFC Platinum ngokuvuma ukuzodlalela eBarbourfields. Singakhohlwa njalo ukuthi ukuphumelela kwaleliqembu lakithi kuzavulela izikhala kwamanye amaqembu ethu ukuthi avunyelwe ukuncintisa kunkezo zeCaf njengalokho esikubona eSouth Africa,” kutsho uTshambo.

Abalandeli beFC Platinum ngokunjalo sebebike ukuba bazagada amabhasi ngobunengi babo bezoxhasa eyakibo.

Kukhasi labo likaTwitter, iFC Platinum ithe ayizwa buhlungu ngokudlala eBarbourfields ngenxa yokuthi inkundla le ilikhaya labo.

Kusenjalo abadlali beFC Platinum baqale ukugijima belolongela lumdlalo beseMagumeni ngoLwesithathu ekuseni.

UMthunywa ufike kulinkundla lapho umqeqetshi uNorman Mapeza abonakale ekhuza iqembu kulindwe uMgqibelo.

Ezinkulu zaseSoweto zikhangelelwe ukufika koBulawayo ngoLwesine kumbe ngoLwesihlanu ekuseni.