uMthunywa
ZiNtatheli zikaMthunywa
SEBEZITSHAYELA imali ngobudoda (sperm) omahotsha beGwanda nanko phela kubikwa buyiphonzi emangalisayo etshiya ijwabu libutshelezi njalo kukholelwa ukuthi lo obugcobileyo uba lesithunzi emphakathini, uMthunywa uyakuveza lokhu lamhlanje.
Kuvele ukuba omahotsha kabasakwekethisi ukusebenzisa amakhondomu hatshi ngoba befuna ukuzivikela kumikhuhlane ethelelwana emacansini kodwa ngenxa yokuthi bafuna ukuvuna ubudoda lobu bazenzele amasheleni.
Imbodlela encinyane yeVaseline elobudoda ithengiswa nge$5.
UMthunywa esezwe udletshana ngodaba lolu ubhekise amabombo emaJahundeni wadingisisa kabanzi ngalindaba.
Ekhuluma loMthunywa uCresenzia Mhlanga ongomunye walabo abathengisa imizimba uchaze ukuba udaba lwenhlanyelo yabobaba luliqiniso.
“Nxa sesimsebenzini wethu webusuku kasisadlali ngokusebenzisa amakhondomu.
“Kudala umuntu ubethi angangithembisa imali engcono ukuthi ahlangane lami ngingazivikelanga bengingacabangi kabili kodwa kulezinsuku sengicabanga ukuthi ngiyenelisa ukwenza enye imali ngokuthengisa ubudoda bakhe.
“Amadoda wona ayabe ekhumbula ukuthi sifuna ukuzivikela emikhuhlaneni kanti ngitsho sokuvuke imali ngenhlanyelo yabo,” kuchaza uMhlanga.
“Ijwabu lami njengoba ulibona nje selicwebezela kungenxa yenhlanyelo yabobaba. Ungabugcoba kawudingi ngitsho amafutha amanengi nengi adulayo ngoba kuhle kuguquke isikhumba sakho sibe njengesosane.
UMthunywa uxhumane njalo lomunye umahotsha uNkosazana Ntokozo Nkomo ochaze ukuba udaba olunjalo luyaphila.
“Inhlanyelo yabobaba thina njengomama bebusuku siyayisebenzisa ukuba sithole isithunzi. Uyazi ukuthi thina njengomama bebusuku sikhangelelwa phansi kodwa singabugcoba ubudoda abantu bayasihlonipha njalo basesabe.
“Inhlonipho oyiphiwa lapho ohamba khona ngumphakathi iyabe ilingana lenhlonipho ephiwa umuntu wesilisa,” kubika uNkszn Nkomo.
Ukuchwayisisa okwenziwe nguMthunywa ebulenjini kuveze ukuba ubudoda ngempela benza ijwabu libe butshelezi. Ababona ngezezayensi baveza ukuthi ubudoda bulakho ukwenza ijwabu libe butshelezi, buthakathaka njalo buyenelisa ukwenqabela ukutshwabhana kwejwabu kanye lokuqeda amaqhubu.
