uMthunywa
Ethel Ncube
AZILAMATHE izakhamizi zeMagwegwe koBulawayo ngemva kokutholakala komunye umama egqoke isudu yokuzalwa ephethe ukhomane.
Isiga lesi senzakale kuyonale iviki lapho inina leli okungasatholakalanga ibizo lalo lificwe yizakhamizi bucwadlana lenkamba yamapholisa.
Abasiki bebunda baveze ukuthi inina leli liveze ukuthi livela ePlumtree njalo kalikwazi ukuthi lifike njani eMagwegwe.
Iphephandaba likazulu livakatshele inkamba yamapholisa lapho okuvalelwe khona inina leli lakhulumisana lesinye isakhamuzi uNkosazana Jane Dube oveze ukuba basele betshe amathe ngokubona inina elidala libhunyumunu.
“Lokhe ngathwetshulwa yingwe ngiyaqala ukubona umuntu enqunu ephethe ukhomane olugugileyo ngezandla. Lo ngumthakathi olahlekileyo kumbe uphunyelwe lilanga esendleleni ngoba ubesithi uvela ePlumtree.
“Ngesikhathi sifika amapholisa ebevele esemgombolozele ngikhuluma nje usenkambeni yamapholisa. Kazange achaze ibizo lakhe kodwa uthe kibo kusePlumtree kuphela,” kuchaza uNkszn Dube.
Ekhuluma loMthunywa uMnumzana Bekezelani Ndimande uveze ukuba umuntu lo kukhanya kaziwa lapha njalo angabe engumthakathi.
“Umama lo kukhanya ubephapha ngokhomane lwakhe njengoba sasizwe kukhulunywa ngabathakathi. Lo ngumthakathi qha akulamuntu ohamba enqunu ngapha ephethe ukhomane. Kukhona okutshaya amanzi lapha. Amapholisa sithi kamkhulule ayala yikho nje sime egedini. Abanye bazame ukungena enkambeni bethi bafuna ukumbona amapholisa abavimba. Amapholisa enza kuhle ngoba bengamkhupha bangambulala abantu,” kutsho uMnu Ndimande.
Uqhubekele phambili eveza ukuba lamuhla bayatshona emapholiseni.
“Lamuhla siyatshona lapha egedini asisuki umthakathi simfuna lapha. Umuntu wePlumtree ufike njani lapha enqunu. Lamuhla sizake sibone asiyi ndawo,” kuveza uMnu Ndimande.
Imizamo yokukhulumisana lenina leli yehlule ngoba amapholisa alile ukuthi intatheli ikhulume laye.
