uMthunywa
Thando Dube
ABASABUQUTHI ubuthongo ababalisi beMashumba Primary eRatanyana nanko phela kulabondofa okubikwa babahlubula izigqoko zangasese ebusuku, uMthunywa ukuzwile lokhu.
Ababalisi kanye labafundi bakulesi sikolo sebeze bafulathela batshiya esikolo kungelabantu ngenxa yokunyamalalelwa ngamaphenti atshontshwa ngondofa abalala beguduza njalo bebatshaya.
UMthunywa ukhulumisane lesakhamuzi seRatanyana esiveze ukuthi ababalisi sebecela ukuhlala emzini yezakhamizi ngokwesaba ondofa.
“Kunzima okulapha, ababalisi sebecela ukuhlala ezakhamizini bebalekela ondofa. Kusele nje umbalisi oyedwa kulesisikolo yena ofundisa oGrade 7 kodwa abanye balala ezakhamizini.
“Ondofa laba bayabahlukuluza sonke isikhathi bengaya emakamelweni abo okulala nanko phela balala bebanga umsindo beguduza ezimbizeni bebatshaya.
“Abanye babo bavuka ekuseni bengelampahla yangasese sebekhitshwe ngondofa laba,” kuchaza umfakazi lo ongathandanga ukuqanjwa ngebizo.
Uphinde wathi abanye abafundi sebeze bekhetha ukuyafunda kwezinye izikolo.
“Labafundi labo kukhanya bayababona ondofa laba libalele ngakho abanye bakhona sebeze basuswa esikolo lesi ngabazali babo ukuze bayefunda kwezinye izikolo eziseduze.
Omunye umfakazi okhulume loMthunywa uthe uhlupho olukhona yikuthi induna uNyangazonke iyala ukuthi ondofa laba bakhitshwe esikolo lesi.
UMthunywa ukhulumisane loProvincial Education Officer weSabelweni seMatabeleland South uMnumzana Lefius Masukume othe udaba lolu kakaluzwa.
“Udaba lwabondofa esikolo seMashumba okwakhathesi angikalutholi,” kuphetha uMnu Masukume.
Imizamo yokukhulumisana lenduna uNyangazonke yehlule ngoba ucingo belukhala kodwa aluqume.
