uMthunywa
Nkosilathi Sibanda
BAZOBHEMA bakholwe abalandeli beHighlanders emdlalweni wabo leChapungu kumdlalo weCastle Lager Premiership ozadlalwa ngeSonto enkundleni yeBarbourfields.
URahman Kustanzira ongumsekeli kakaputeni weBosso, uthe abathandi baleliqembu kumele baphume ngenkani ukuzobuka ukuthi bona njengabadlali bazimisile kanjani ukusebenzisa bonke ubungcitshi ukuze banqobe.
Umdlalo lo ukhangelwe ngabomvu ngabalandeli beTshilamoya nanko isibatshile umoya ngendlela abangakaze bayibone ngokunqotshwa kwayo. IBosso kulezinsuku izinto aziyihambeli kahle.
“Okwenzakalayo kumidlalo edluleyo asikutshiyeni emuva. Kulumdlalo leChapungu, sizaqala kutsha, sizayitshaya inabe iChapungu,” kutsho uKutsanzira.
IHighlanders isinqotshwe imidlalo emithathu ilandelana okwenze abalandeli bayo basola ukuthi izavuka yenelise ukulwela isicoco seligi. Kulindelwe ukuba lizamazame phezulu kweChapungu ngeSonto. Abasekeli beqiniso bakaMantengwane babikele uMthunywa ukuthi bazasuka kuwo wonke amakhona elizwe bezobukela ithimu yabo.
Ngalindlela bengayinceda ukuthi ihlohle.
UKutsanzira uthe abalandeli babo bazaphuma bejabulile kulumdlalo ngoba imiklomelo bayifuna yonke.
“Njengoba umdlalo wethu usekhaya kuyasikhuthaza ukuthi sisebenze ngcono, sithabise abalandeli bethu.”
Uqhubekele phambili exwayisa abalandeli ngokuthi udlame kayisilo isixazululo nxa kukhona abakuzondileyo ngokudliwa kwabo.
Ngempelaviki edluleyo, ezinkulu zinqotshwe 3-0 yiNgezi Platinum.
“Engikucelayo nje yikuthi nxa bekhona abangakuboni kahle ukunqotshwa kwethu bangasebenzisi udlame. Siyathembisa ukuthi ngeke sibaphoxe abasekeli bethu. Esikucelayo yikuthi beze ngobunengi babo,” kutsho uKutsanzira.
Imidlalo yePSL kuliviki:
NgoMgqibelo: Yadah v Bantu Rover (Morris Depot), Bulawayo City v ZPC Kariba ( White City), How Mine v Chicken Inn (White City), Harare City v Tsholotsho ( Rufaro), Black Rhinos v Triangle (Rufaro)
NgeSonto: Highlanders v Chapungu (White City), Caps United v Dynamos (National Sports Stadium), Hwange v FC Platinum (Colliery), Shabanie Mine v Ngezi Platinum (Maglas).
