Bazintshantshu abafundi beJohn Tallach

21 Jun, 2018 - 00:06 0 Views
Bazintshantshu abafundi beJohn Tallach

uMthunywa

Arnold Ndlovu
SIPHINDE yenza njalo edume ngakho iJohn Tallach High School nanko phela ibe yintshantshu elizweni lonke jikelele kumncintiswano weOld Mutual Schools Quiz Competition kanye leBook of African Records.

Isikolo lesi ebesimelwe ngabafundi abane kulumncintiswano, saqala sanqoba esigabeni seMatabeleland North basebesiya mela isigaba sonke eHarare lapho ababencintisana khona labafundi abavela kwezinye izigaba zakuleli ilizwe.

Iqembu leli elalivela esikolo lesi elabafana abane lafika eHarare labhuqa zonke laphiwa umvuzo wezicoco ezigoqela iTrophy, ama-laptops abafundi ababephatheka emncintiswaneni kanye lemota yomhlobo weHonda Fit.

Ekhuluma emcimbini lo ngoLwesithathu kuviki ephelileyo obemele uProvincial Education Director wesabelweni seMatabeleland North, uMnumzana Themba Ndlovu uthe umsebenzi owenziwe yisikolo lesi muhle njalo ukhuthaza abafundi ukuthi basebenze nzima ukuze labo baphakamise izinga lezemfundo esabelweni lesi.

“Umsebenzi omuhle lo owenziwe ngabantwana laba siyawubonga kakhulu, ngoba bathi ngemva kokunqoba esigabeni sethu badlulela phambili sebemele isigaba sonke bayakhangelana lezinye izigaba zelizwe bafika banqoba njalo, sibatshayela ihlombe ngalokhu.

“Ukufunda silandela i-curriculum entsha yikho okulawula njalo kuqondise abafundi enhlelweni ezinengi ezitshiyeneyo; abanye ngabenelisa emabhukwini kukanti abanye bazintshantshu emidlalweni. Ilizwe leZimbabwe liyaziwa emhlabeni wonke jikelele ngezemfundo njalo ngigqugquzela intsha ukuba iqhubeke izibambile ezifundweni,” amazwi kaMnu Ndlovu.

Ekhuluma njalo emcimbini lo uMgcinisihlalo wesikolo lesi, uMnumzana Jackson Ndlovu uthe impumela yabantwana laba kuyinto enhle kakhulu esikolo lesi ngoba sokuyiminyaka benqoba kwezemfundo njalo kufanele beqhube kunjalo.

“Njengesikolo seJohn Tallach siyakhuthaza ukuthi abafundi beqhubeke bezibambile kwezemfundo njengenhlalayenza. Ngifisa ukuthi baqhubeke kunjalo laseminyakeni elandelayo,” kuphetha uMnu Ndlovu.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds