Bazaphakulula ezimnandi abadlali lonyaka

14 Jan, 2016 - 00:01 0 Views
Bazaphakulula ezimnandi abadlali lonyaka Sarah Mpofu- Sibanda

uMthunywa

Cornelius Luphahla
ABADLALI bobulingisi koMthwakazi bathembisa uzulu ukuba lonyaka uzajabula kusa kwamalanga nanko phela bamphathele indaba ezimnandi njalo ezintsha kwezemidlalo.

Abanye balaba badlali abathembisa uMthwakazi indaba lezi ezihlabusayo nguSarah Mpofu-Sibanda, uPatrick Mabhena kanye lo Lewis Ndlovu, abangabadlali abavame ukudlala imidlalo le besedolobheni lakoBulawayo.

UMthunywa ukhulumisane loSarah Mpofu-Sibanda wachaza ukuthi lonyaka bajonge ukujabulisa uzulu okwamagama.

“Mina njengomdlali obuye abe ngumqondisi, lonyaka ngikhangelele ukuthi imidlalo engiyidlalayo izajabulisa umphakathi ngendlela emangalisayo ngoba angizake ngidlale umdlalo ongithokozisa njengale engizayidlala lonyaka.

“Noma nje eminye yemidlalo le ngingakayisunguli ngilethemba lokuthi njengoba ngizayisungula ngiyiqede kuwonalo umnyaka, abantu bazayijabulela ngoba izabe imnandi imihlola,” kutsho uMpofu-Sibanda.

Ekhuluma lentatheli uPatrick Mabhena omunye wabalobi bemidlalo yobulingisi uveze ukuthi ulomdlalo omnandi kakhulu okhangelele ukuwukhipha ensukwini ezimbalwa ezizayo.

“Njengomlobi wemidlalo yobulingisi khathesi ngisapheka omunye umdlalo othi ‘Umzotshayo’. Umdlalo lo susele lezahluko ezimbili lengxenye kuphela ngakho akunsuku zatshwala ungaphelanga,” kutsho uMabhena.

Uqhubekele phambili njalo waveza ukuba umdlalo lo umnandi kakhulu ngoba uqukethe imfundiso enhle ngezamasiko.

“Umdlalo lo ngiyazi ukuthi uzulu uzawujabulela ngoba ungumthaphi wamasiko kanye lenhlalo yamaNdebele.

Ngezinye indlela ngingathi umdlalo lo uzavusa usinga kuMthwakazi ingwevu zikhumbule ngethuba zisakhula izalukazi lazo zikhumbule ngethuba zisamekeza zizintombi,” kuchaza uMabhena.

ULewis Ndlovu omunye walababadlali bobulingisi uchaze ukuthi laye ukhangelele ukukhiphela uzulu omunye umdlalo ohlabusayo.

“Lonyaka ngilethemba lokuthi uMthwakazi uzajabula ngoba kulomdlalo othi UNyembezi obuselesikhathi eside uphekwa ngakho ngikhangelele ukuthi umdlalo lo ukhitshwe ebantwini mhlaka 27 Mbimbitho ngeWorld Theatre Day. Umdlalo lo ngendlela ophekwe isikhathi eside ngawo kusobala ukuba mhla uvuthwayo abantu bazawujabulela kakhulu ngoba uphekwe ngobunono obukhulu,” kuphetha uNdlovu.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds