uMthunywa
YiNtatheli kaMthunywa
KULESELA elihlala eMusenampongo eBinga okubikwa lithwalise omongikazi benye ikilinika amagabha avuzayo ngokubatshontshela impahla zabo ngesikhathi belele.
Isigelekeqe lesi uMemba Mudenda oleminyaka yokuzalwa engu-32 kubikwa besenza omongi laba besabe ukulala ezindlini zabo ngoba evula ezindlini zabo lanxa kuvaliwe.
Umtshutshisi wecala leli uMnumzana Bruce Maphosa ubikele inkundla yeBinga kuyonale iviki ukuba umsolwa ubesehluphile ngokutshontshela omongi kunye lezakhamizi omakhalekhukhwini.
Kuzwakale ukuba mhlaka-8 Nhlolanja umsolwa wangena endlini kamamangala uPeter Munkuli ongumongi watshontsha amafoni ayisithupha wasedliwa ngumswenya.
Kubikwa ngelilandelayo umsolwa waphinda wagqekeza kwenye indlu kukhiyiwe watshontsha njalo omakhalekhukhwini.
Kuzwakale ukuba umsolwa ubesekwenze kwaba ngumkhuba ukutshontshela omongi kunye lezinye izakhamizi.
Umtshutshisi uqhubekele phambili wathi umamangala wayefake umakhalekhukhwini wakhe i-mobile tracker ngakho umsolwa wathi esetshontshe omakhalekhukhukhwini laba wabathengisela enye indoda. Leyondoda kubikwa yasebenzisa omakhalekhuhkwini labo ingazi ukuba yayisizokhele amahlahle ekhanda.
Kubikwa umsolwa esebonile ukuba ngubani osebenzisa umakhalekhukhwini wakhe wabika udaba emapholiseni okwabangela ukuba leyondoda ibotshwe yasivezela amapholisa ukuba yathenga omakhalekhukhwini laba kumsolwa okwabangela ukuthi umsolwa abotshwe
Impahla zonke ezatshontshwa ngumsolwa zibiza imali engange $400.
Ebuzwa ngumantshi uNkosikazi Ailen Mutukati umsolwa wale wemba phansi ukuba watshontsha omakhalekhukhwini laba.
Lanxa umsolwa ezame ukucatsha ngomunwe inkundla imfumane elecala lokutshontsha omakhalekhukhwini.
Umsolwa kubikwa ubevele elecala elifanayo ake alidala.
Umantshi umgwebe ukuhlawula imali engange-$371 ngemva kwalokhu wamgweba ukupika okomnyaka owodwa.
Umsolwa esezapika okweminyaka emithathu sekugoqela leminyaka ayeyigwetshelwe ukutshontsha kwakhe okokuqala.
