uMthunywa
Yintatheli KaMthunywa
KULOMAMA welokitshini leCowdray Park koBulawayo ophose watshaywa luzhizhi lwabantu esetheswa icala lokuthi uyaloya ngoba etholakale ‘‘encinda’’ igazi kuliviki.
Umama lo igama lakhe elingasatholakalanga kubikwa utholakale ehleli kunjanji ngoMvulo egave igazi okuyimbangela yokuthi abantu bacabangele ukuthi uyaloya kukanti ukhathazwa ngumkhuhlane wengqondo.
UMthunywa ukhulumisane lomunye wezakhamizi zeCowdray Park uMnumzana Thomas Ngwenya duze lalapha umama lo atholakale khona oveze ukuthi abantu bebezonde begane unwabu befuna ukumtshaya bethi ngumthakathi.
“Izakhamizi zalapha bezingasadlanga nkotshana zifuna ukutshaya umama lo.
“Abantu bebesithi uyaloya ngoba ubelegazi emlonyeni njalo bengamazi okwenze bacabangela ukuthi ubewele enjanjini ebusuku ngesikhathi eloya ebusuku.Abanye bathi ubesithi ufuna ukudla inyama yomuntu, angazi kumbe lokho liqiniso.
“Okusizileyo yikufika kwamapholisa ahle amthatha ahamba laye enkambeni yawo ngoba abanye abantu abakade belapho besebesithi kabulawe,” kuchaza uMnu Ngwenya.
Omunye umfakazi okhulume lentatheli uthe okwengezelele umlilo kundaba le yimilayezo ebisithunyelwa ebulenjini ngomama lo.
“Abantu bahle baqala ukusabalalisa imilayezo ngomama lo abanye besithi ubonakale esidla ikhanda lomuntu njalo abanye besithi ubethwele unyawo lomntwana okungasiqiniso ngoba ngesikhathi etholakala ubezihlalele,” kutsho umfakazi.
UMthunywa uvakatshele kuleyondawo wakhulumisana lokutholakale ukuthi nguNkosikazi Mthombeni kuphela oweResidents Association oveze ukuthi umama lo bekukhanya ukuthi uphila lomkhuhlane wengqondo.
“Ukuthi umama lo uyaloya yikuphambanisa ngoba ngezenzo zikamama lo bekusobala ukuthi ugula umkhuhlane wengqondo. Igazi akade elincinda emlonyeni bekungelakhe ngoba ubelimele emunweni.
“Ngimthethe sibili ngamgcina endlini yami ngamnika amahewu wanatha. Ubengakhulumi kodwa nxa abantu bembuza ibizo lakhe ubebhala phansi ngogodo akade eluthwele,” nguNkkz Mthombeni.
UMthunywa uphinde wakhulumisana lesikhulumi samapholisa koBulawayo uAssistant Inspector Abednico Ncube othe umama lo akasi mthakathi, uphila lomkhuhlane wengqondo.
“Udaba lwenina elitholakale enjanjini lilegazi emlonyeni eliphose latshaywa ngabantu becabangela ukuthi ngumthakathi siluzwile. Kuvele ukuba lumama ugula umkhuhlane wengqondo njalo ubemuke endlini wayahlala enjanjini. Imuli yakhe ibisivule icala lomuntu olahlekileyo.
“Ulandwe yimuli yakhe emapholiseni,” kuphetha uAssistant Inspector Ncube.
