uMthunywa
SIYAHLANGANA njalo bangane kuliviki, ngilethemba lonke ziyalikhiphela, ezikolo lasemisebenzini. Olova labo asibakhohlwa ngiyazi ziyawa khonapho emabholohweni lasemakhaya.
Kuliviki sizake sithinte izinto ezimbili esezithumbe impilo yenengi labatsha. Ekwenziweni kwazo zenzelwa ukwenza impilo ibe lula kodwa kukhanya seziyibhidlizile kwabanengi. Sikhuluma ngeWhatsApp lama-earphones.
Inengi labatsha lilemihlobo lemihlobo yamafoni njalo ufaka ingoma zonke azithandayo ukuze azilalele noma yisiphi isikhathi.
Lawo ale-WhatsApp wona asikhulumi, bachofa lapha, umuntu aze akhohlwe lokudla uqobo. Njengoba ngitshilo ukuthi izinto lezi zenzelwa ukusisiza empilweni kodwa okunye lathi sesizenza i-abuse.
Ezindlini lapha akusela muntu oxoxa labazali bakhe. Uthola umuntu lanxa kudliwa, uphethe uyachofa. Abanye lesikhathi sokudla lemuli abaselaso umuntu udla yona i-WhatsApp leyo.
Umzali lanxa ekhuluma vele kasezwa lutho, lokumbona kasamboni. Usezibona esezweni lakhe lalowo axoxa laye kuyo iWhatsApp leyo. Uthola lapha umuntu elavuka ngohleko eyedwa kungelamuntu okhulume laye bemqumbaqumba abakwaziyo.
Mhla umuntu ethe wacabanga ukudla kanye lemuli umakhalekhukhwini kabekwa phansi kanti eqeda nje ukudla uvele agxumeke izigxingi zakhe endlebeni, nanguyana ekamelweni lakhe. Nxa umbona esiya lapho ungaziyengi uthi sesiyalala, sesiya ku-all night yakhe ye-WhatsApp kuze kutshaye amadabukakusa elokhu ephethe.
Phezu kwalokho i-volume yefoni iyabe ivulwe yacina, beduma oNicki Minaj lenhlamba zabo ekhanda lomuntu. Nxa sokunjalo uthi lebhuku lisabanjwa kulabo abafundayo. Abasebenzayo labo baphuza njalo nje emsebenzini kuthi lanxa sebelapho umuntu awozele aze ahawule, khona ngalesisikhathi sokutshisa, abanye balala baze bagxoze lendenda.
Abanye lasemtshoveni ufica umuntu, phakathi kwabantu sephonguvimbanisa egegedeka ebangela abanye abantu umsindo, khonapho uzabuzwa ngubani njengoba ama-earphones lawo ayabe eduma okwe-disco ngokwayo endlebeni zakhe.
Kuqakathekile bangane ukuthi sinanzelele singathunjelwa impilo zethu yizinto esizithenga ngemali zethu. Angizange ngithi i-WhatsApp lama-earphones ethu silahle kodwa asikusebenziseni ngesikhathi kufanele hatshi lokhu esikubonayo, othola abantu bebhizi noma bese-church.
Asihlanganeni njalo.
