Baphathwa ngesineke abesifazana bakwethu

04 Jan, 2018 - 01:01 0 Views
Baphathwa ngesineke abesifazana bakwethu

uMthunywa

Kuloba uCornelius Luphahla

MTHWAKAZI omuhle ondlela zimhlophe kwakube kubi nxa ngiziba indaba yokuchitheka kwemizi loba nje uzulu ehlala ekhala ngayo edinga isixazululo sokuthi cebo bani elingenziwa ukuze umuhlwa lo uthintitheke. Angithi nje iBhayibhili elingcwele lithi indoda yinhloko yomuzi. Ngalokhu kubalulekile ukuthi amadoda akwazi ukuphilisana kuhle labomkabo.

Yebo kambe inengi lakulezinsuku kalisakwazi ukuthi owesifazana uphathwa ngesineke ngoba yisitsha esibuthakthaka ngakho kwakube kuhle ukuthi lawe ndoda umphathe kuhle umkakho ukuze phela loluju lwakhona luncindeke kujule legazi.

Phela manengi amadoda acina ukutshela omkabo amazwi amnandi ngesikhathi besasengamajaha, kuhle kube sobala ukuthi indoda enjalo kayilaso isiphatho esihle njalo ngaleso sikhathi isakwenza lokhu yayisenga ezimithiyo.

Bobaba nxa uhlezi lomkakho kuqakathekile ukuthi umtshele amazwi amnandi umbalisele ngothando olusenhliziyweni yakho aze akhumbule ngensuku esaseyintombi. Ukumjabulisa lokhu kwenza uthando lwenu luhlale luvutha kuthi lamhla lithe laphambanisana lixolelane masinyane.

Akhona amadoda athi angavela emsebenzini afike adle angene angutsheni alale obukaBhuka kuze kuse. Indoda enjalo yenza lokhu ikhohlwe lokuthi ithethe, isiphatha umkayo njengodadewabo. Pho kuyabe kusaseyindoda bani le enjalo? Angithi yikho lokhu okudala ukuthi owesifazana aphume phandle?

Madoda akuthi nxa usubona ukuthi iqolo alisavumi ukhulumisane lomkakho njalo umtshengise uthando ukuze lincedisane ukulungisa indaba yenu. Okunye njalo akuthi nxa uyindoda usuthe wajumeka ungananzeleli ukuthi umkakho usakufuna ungamuzwa esekunyikinya uvuke akubikele isikhalazo sakhe lawe uzame njengendoda.

Okuqakathekileyo ezindlini luthando kanye lokuvumelana lowakwakho umbalisele okukukhathazayo. Akhona amanye amadoda asuka aphumele ngaphandle ngendlela ezicebelayo. Umuntu wakhona engaphuma njalo uthi nxa efika ntambama afikele ukulala khonapho khonapho engakaze akwenze.

Nxa uyindoda usazi ukuthi kawenelisi ukuphatha imizi emibili kungcono uhle wekele ukuphuma ngaphandle ngoba umkakho uzakunanzelela usufika udiniwe nsukuzonke. Yikho-ke ukuzithengisa okwenziwa ngabesilisa abanengi.

Kuqakathekile bakaMalandela ukuthi likwazi ukuthi umkakho akafani lomabonakude wasekamelweni osebenza ukubukwa kuphela zwi.

Amanye amadoda adiliza imizi yawo ngokujaha nxa besendlini lomkakhe. Lokhu kuyingozi enkulu njalo yilo uhlupho lwamadoda anengi. Indoda enjalo kayiziphi isikhathi sokudlalisa umkayo aze ajabule okujulileyo. Umuntu wakhona usuka akhangelele ukuthi akholise yedwa umkakhe asale ekhathazekile.

Akwenziwa njalo madoda, nxa uyindoda yazi ukuthi umkakho ngowakho kawumjahi ngoba kawumtshontshi. Khona ungavela umtshengise uthando okokuqala uhle ancibilike masinyane ngoba uyabe esejabule ngakho injabulo yomuntu iyenza igazi lakhe ligijime kalula.

Fundani bakaMthwakazi ikakhulu abesilisa ukuthi imizi yenu liyiphatha ngendlela enambithekayo njalo eyiqinisayo.

Umkakho kahlale ethokozile umtshele ukuthi uyamthanda ubuye utshengise ngokwenza lokho owamthathela khona.

Phela abanye abesilisa kabasakazi ukuthi owesifazana uthathelani ngoba bathi bengathatha bahle balibale lokuthi uyajabuliswa ngokwenkonzo yasendlini.

Yebo kambe kwakwenzakale ukuthi umuntu abe lendubo zakhe zicabangayo kungakhathalekile ukuthi ngubani kodwa lokhu akutsho ukuthi kungalehlukanisa lenkonzo yokubuyisana endlini.

Lani besifazana phela kwakube kuhle ukuthi libadedele omnkenu bajabule ngokwesithelo sevini ukuze bengaze bakhangwa yizithelo zalabo abazinqe ngosiqapheqaphe.

Phela ungamncitsha umdlansitha owesilisa akaze waphuza ukuphambuka ayekotha komakhelwane. Ngalokhu ngilethemba lokuthi uzulu uyayizwa lindaba njalo uzayicubungula kabanzi aphume leqiniso ngqo.

Sengitshaye kwenela bakwethu sokusalele lina ukuthi liluthaphe loluluju liyelunambitha labomkenu ezindlini.

Yakhiwe imizi iqine njengasendulo kungabikhona osolayo ezindlini.

  • Mlobi ngiyakubingelela. Ngithanda ukubonga kakhulu umsebenzi wakho osenzela wona owokusikhumbuza ngezasendulo. Qhubeka usebenza ungadeli ngoba umkhulu umsebenzi lo owenzela uzulu. — Innocent Tshuma, Lupane.
  • Umsebenzi wakho uyancomeka kakhulu njalo balutshwana abantu abasenelisa ukuwenza. Ngalokhu ngabe kuyavuma ubuzavakatshela endaweni ezitshiyeneyo uchazela abantu ngezamasiko ngoba iphephandaba likazulu kalifiki kwezinye indawo okulabantu abalidingayo. — Thabani Ncube, Nkayi.
  • Qhubekela phambili mlobi ngomsebenzi wakho osenzela wona. Ungalibali ukusichazela kakhulu ngendaba ezichitha imizi kanye lokuthi kwakusenqatshelwa kanjani lokhu ngoba imizi eminengi iyachitheka. — Sithabile Hlabangani, Cowdray Park, Bulawayo.
  • Mlobi nceda ufundise intsha ngenhlalo yasendulo ngoba inengi layo lisemnyameni ngezamasiko njalo kalisagoqeki ngenxa yokungazi amasiko. — Zanele Jubane, Gwanda.
  • Ungaxhumana lomlobi ku-0775722298 kumbe ku WhatsApp 0737771317.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds