uMthunywa
Ethel Ncube
ABALOBI bakoBulawayo bancoma isitolo sezingwalo esavulwa ngomunye umlobi ngendlela yokuzama ukuthuthukisa abalobi ukuba imisebenzi yabo ifinyelelwe nguzulu wonke.
Isitolo lesi esivulwe ngenyanga ephelileyo sithengisa imihlobo yezingwalo zokubala ezitshiyeneyo kanye lamabhuku eNew Curriculum ayatholakala lapha. Intatheli ikhulumisane lomunye wabalobi uMnumzana Target Ndlovu oveze ukuba isitolo samabhuku lesi siqakathekile emazingeni wonke kwezemfundo kanye labafuna ukuchitha isikhathi sabo bebala,
“Njengomunye wabalobi isitolo lesi singumthombo wolwazi ikakhulu kumazinga onke okufunda kanye lawokuzithokozisa. Akukuhlanga njengozulu ukuthi sikhuthwe ngamathuba okuthuthukisa ingqondo kanye lempilo zethu njengalawa ukuyifinqa ngamafitshane,” kubika umlobi uNdlovu.
Ekhuluma loMthunywa uNkosazana Siphathisiwe Mdawini uveze ukuba lesisitolo usibona siyisibusiso kuzulu wonke wakoBulawayo labangaphandle kwedolobho
“Ukuba lendawo ethengisa amabhuku alotshwe ngabalobi bakithi kuyinto enhle kakhulu njalo amabhuku la afike ngesikhathi esihle lapho uHulumende efake uhlelo lwe-New Curriculum, amabhuku akhona ayatholakala khonapho. Kungakho uBulawayo kumele ayisekele ukuze abantwabethu bathole izingwalo zokubala ezizabaphathisa ezifundweni zabo,” kutsho uNkszn Mdawini.
UMthunywa uxoxe loMnu Witness Dingani onguye owenza iqhinga lokuba kuvulwe isitolo lesi oveze ukuba abalobi kabasondele eduze baveze imisebenzi yabo.
“Nginxunsa bonke abalobi ukuba babuye bazobukisa amabhuku abo esitolo lesi ngoba izingwalo ziqakathekile kakhulu emphakathini. Okulotshwe phansi kugcinakala ngcono kulento ekhulunywayo njalo kwenza labantwana lezizukulwane ezizalandela zikwazi imbali. Lapha silemihlobo etshiyeneyo yamabhuku angancedisa abafundi ezikolo. Gijima uzozibonela wedwa uthole usizo,” kuphetha uMnu Dingani.
