uMthunywa
Arnold Ndlovu
AKUSEYIKHO kuphinda umphehlo kubahlabeleli bakoBulawayo ngoba sokuyinjayelo ukwehluleka kwabo ukufika ezingeni elikhangelwa kundondo zamaNama.
Ama-National Arts Merits Awards ngumcimbi okhangela amathalenta agoqela abantu abalingisayo, abahlabeleli, omahlekisa abalobi lokunye. Elizweni lonke jikelele ukubapha izicoco ngemisebenzi yabo.
Inhlanganiso ekhangela izicoco lezi yi-National Arts Council of Zimbabwe (NACZ).
Umcimbi walonyaka wama Nama uzaqhutshelwa esigodlweni seHarare mhlaka 17 kuyonale inyanga kodwa kubahlabeleli bakoBulawayo sokuzasala ukuthi balanda ukuyaqakezela abanye abahlabeleli.
Lonyaka khona kwehlula ngitsho loyedwa umhlabeleli ovela koNtuthu ukuthi akhethwe kuma-Nama. Lokhu kumangaze abantu abanengi ukuthi ukukhethwa kwama-Nama kutshengisa ukuthi akula mhlabeleli wakoBulawayo abambona esezingeni eliphezulu ukuze ancintise labahlabeleli abafana labo Jah Prayzah labanye.
Abahlabeleli bakoBulawayo sebelawo ama-Bulawayo Arts Awards laweSkyz Metro FM Awards kodwa nxa kukhangelwa langaphandle kwelizwe kuyadingakala ukuthi abahlabeleli balapha bakhangelele ukuba yingxenye yamaNama.
Okunye okungabe kubisela abahlabeleli bakoBulawayo emuva yikuthi basuthiseka ngokutshayela abantu bakoNtuthu kuphela okwenza babe balutshwane abavakatshela kwezinye indawo eMatabeleland leHarare.
Lanxa imisebenzi yabahlabeleli bakoBulawayo ingafinyeleli ilizwe lonke abahlabeleli abafana lo Trevor Dongo bakhethwa njani ukuncintisa ku-Outstanding Male le-Outstanding Album phambi kwabahlabeleli ababe lomnyaka omuhle abagoqela uCal_Vin, POY bengekho.
Okunye okumele kukhangelwe kakhulu ngabahlabeleli bakoNtuthu yimisebenzi eyenziwa ngabalingisi, omahlekisa lamagabazi ngoba bona eyabo imisebenzi minyaka yonke iqhubeka itholakala ekuncintisaneni kumaNama lokuthakazelelwa langaphandle kwelizwe.
Abahlabeleli bakoBulawayo ukuze bazithole labo sebephuma besiyakwamanye amazwe ngomculo wabo kufanele baqale benelise ukwenza umculo wabo ulalelwe elizweni.
