uMthunywa
Nomthandazo Ndlovu
ZIZITIKE ngokudla inkukhu lezinja emfeni wenye indoda esigabeni sakoNyamazana eNkayi nanko phela izakhamizi zale ukudla ngoba umuyi esolelwa ukuthi wayengumkhunkuli ovutha bhe ngensuku esaphila.
Lesi siga sendaba senzakale ngeviki ephelileyo lapho uMnumzana Smart Tshuma athe ebekwa khona abantu bala ukudla emfeni yakhe ngoba besithi ubeloya. Lokhu kuvela ngemva kwendaba eyaphuma nyakenye kuphephandaba likazulu ukuthi kucatshangelwa ukuthi waba lesandla ekubhubheni komnawakhe uElliot Tshuma owacina sezwakala ekhuluma phakathi kwekhabe.
Ekhuluma loMthunywa omunye umfakazi ongathandanga ukubethwa ngegama uthe inengi labantu lijabule esigabeni ngokubhubha kwendoda le.
“Abantu bathabile la okuzwayo, uTshuma ubesaziwa njengomuntu ogangayo lapha esigabeni njalo kucatshangelwa ukuthi nguye owabulala umfowabo.
“Inengi labantu lalile lokudla kwakhona besithi mhlawumbe kulomuthi, bayacina begula,” kutsho umfakazi lo.
Elinye inina elithe linguSithembile Ndebele lithe lendlela uSmart abhubhe ngayo ayizwisiseki sibili okutshengisa ukuthi akukodwa lokho.
“USmart ubeselesikhathi eside egula, ukuthi ubegula mkhuhlane bani lathi sinje asikwazi kodwa bekusolisa sibili, kodwa akukuhle ukuthi uthi ungumuntu uphila esigabeni uthi ubhubha abantu bajabule ngale indlela.
“Abantu besabile khona ukudla emfeni yakhe, bebezwakala bengunguna kuphela abantu besithi hatshi basuthi, kambe umuntu wonke emfeni sengathi usuthi njani,” kutsho uNkkz Ndebele.
“Mina ngesabe khona ukudla, kambe umuntu obekhulunywa kangaka esigabeni kuthwa wenza izinto ezihlasimulisa umzimba, ngithe kungcono ngiyezidlela emzini wami kulokudla ngisola,” kuphetha esinye isakhamuzi esingathandanga ukuqanjwa ngebizo.
