uMthunywa
ABALANDELI bebhola lenyawo bakhumbule isikhathi senkezo yomhlaba eka-2010 bebona uAndres Iniesta loMessi bevakatshela eSouth Africa kumkhosi walonyaka eNelson Mandela eFNB Stadium ngoLwesithathu.
Itikiti ebelitshiphile beliyi-500 randi kodwa bayigcwalisile inkundla.
Abadlali laba ababize abantu bebeyingxenye yeqembu leBarcelona elidlale lentshantshu zeligi yeAbsa, iMamelodi Sundowns. Bekutholene ingcitshi zodwa kulumdlalo obukelwe zinkulungwane.
Uvakatshele inkundla yeFNB okwesibili uIniesta ongukaputeni weBarcelona ngemva kokufaka iSpain isicoco sokuqala somhlaba ngebhola alihlohlayo kumdlalo wokucina bebhekane leNetherlands ngoNtulikazi ka2010.
IBarcelona yake yavakatshela eMzansi njalo — ngo2007 ekaFrank Rijkaard eyayibophele izilomo ezinjengoRonaldinho loSamuel Eto’o iguqise eka-Igesund ngo 2-1 eLoftus Versfeld.
Wayesaphila ngaleso sikhathi uMandela, odlule emhlabeni ngo-2013 ikanti u-Iniesta uyatshiya iBarcelona kulisizini.
Ngokutsho komthombo we-ESPN uNiesta kulindeleke ukuthi ajoyine iVissel Kobe yaseJapan.
Ebuya eSouth Africa okokuqala ngemva kokunqoba isicoco sika-2010, u-Iniesta ubehamba leqembu lesizwe leSpain eyadliwa nge 1-0 yiBafana Bafana kaGordon Igesund ngoLwezi ka2013.
Wawuqala lowo mdlalo u-Iniesta kodwa wayelokhu elandela izithunzi zika-Andile Jali loKamohelo Mokotjo, okunguye owakhipha lephasi yebhola elabaselwa nguBernard Parker emambuleni.
U-Iniesta waphetha ngokuphuma etshintshwa nguKoke.
Inengi licabanga ukuba umdlalo wangeSonto oweBarcelona leqembu le-Real Sociedad yiwo ozanikeza uIniesta ithuba lokuthi avalelise abalandeli bakhe kuBarcelona.
Umdlalo lo useCamp Nou, okuyinkundla iBara engakaze idliwe kiyo.
INingizimu Afrika yonke ivungamile ngelithi sengathi abadlali beSundowns sebesezingeni eliphezulu ngoba sebekhona ukumelana lengcitshi zase-Europe.
Kusenjalo, iSundowns isiqakezele izandla umdlali wayo uPercy Tau ngokwenza kuhle kulisizini. UTau nguye ozathatha isicoco somdlali owedlule bonke kuPremier Soccer League okuyinto efanayo eyenzeke ku-Iniesta ngo-2009 ethola eseLa Liga Best Spanish Player.
Ekhuluma ehlweni lukaRobert Marawa olubanjalo ngoLwesine, uSibusiso Vilakazi ongomunye wezithenjwa zeDowns uthe umdlali abheke ngabomvu ukuthi abhekane laye kulumdlalo okulindeleke inkundla igcwale phamu nguLionel Messi. — Ubulembu
