uMthunywa
Nomthandazo Ndlovu
BATHWELE amagabha avuzayo abalimi bezigabeni zeBeitbridge ngendlovu esezihlasele izilimo zabo osekubangele ukuthi balahlekelwe yisivuno sabo.
Kubikwa indlovu lezi eziqale ukuhlupha emasimini ngenyanga edluleyo ziyafohlela emasimini lezivandeni ebusuku zidle izilimo ezilapho zitshiye kubetha umoya.
Ekhuluma loMthunywa uMnumzana Tumelo Sibanda ongumlimi uthe sebephelelwe ngamaqhinga okuthi benzeni ngendlovu lezi.
“Mina vele angiselalutho emasimini ami, indlovu zingenile ebusuku lapha zatshiya zithintithile, angazi ukuthi ngizenza njani lokuthi sengizakuthatha ngaphi ukudla ngoba bengithembele emasimini.
“Okubuhlungu yikuthi indlovu yinyamazana eyingozi ilakho ukubulala umuntu ngakho loba singaze sizizwe akuncedi siyalala kuphela ngoba akuphumeki siyabe siseba,” kutsho uMnu Sibanda.
Omunye umlimi ongenelwe zindlovu lezi othe unguBrian Ndlovu uthe indlovu lezi azitshiyanga lutho ngitsho emasimini akhe.
“Mina ngimangele sengibizwa ngabantwana ababevela hlola emasimini ekuseni besithi kudliwe emasimini, ekufikeni kwami ngathola konakele sibili, ziwonile indlovu.
“Bengihlala ngizizwela kwezinye izigaba ukuthi zidlile kodwa ukuthi zizafika kimi bengingakacabangeli, indlovu lezi minyaka yonke zihlala zingena emasimini abantu zisidla, loba umuntu angaze azizwe akulanto angayenza ngoba ziyingozi,” kuchaza uMnu Ndlovu.
UMnu Ndlovu uqhubekele phambili wathi bacela usizo kuHulumende ukuthi abancedise ngendlovu lezi ngoba abasakhululekanga lanxa behamba egangeni.
“Thina lapha siphila ngokulima, manje indlovu lezi sezisibulala lapha emasimini. Asazi ukuthi sizaphephela ngaphi, ebesikucela yikuthi ugatsha lukaHulumende olubona ngenyamazana luzosincedisa ngoba lathi nxa indlovu lezi zigcwele iganga lonke leli asisaphephanga ngitsho,” kutsho uMnu Ndlovu.
Imizamo yokukhulumisana labeCampfire abakhangela indawo le yehlule kwaze kwafika isikhathi sokudindwa kwephephandaba.
