Uncategorized

Bakhala ezimathonsi ngokudilizelwa imizi

14 May, 2015 - 09:05 0 Views

uMthunywa

cold weather

Cornelius Luphahla
UMQANDO osuqalisile ulakho ukudlula lezinye izakhamizi zakuwadi 28 eLupane nanko phela inhlanganiso yeForestry Commision kubikwa isidilize imizi yezakhamizi ezisanda kuqalisa ukwakha ngoba ithi akuvunyelwa ukuthi isigaba siqheliswe.

UMnumnzana James Sibanda oleminyaka engu-64 yokuzalwa njalo engusobhuku wesigabeni seMaqaqeni ngomunye wabadilizelwe imuzi yinhlanganiso le.

Kuzwakale ukuba uSobhuku Sibanda usele egcekeni ngoMvulo kuviki ephelileyo kulandela ukudilizelwa umuzi ngamapholisa eForestry Commission.

“Amapholisa aqale ukufika emathathu kungoLwesihlanu ekuseni, afika angitshela ukuthi angivunyelwa ukwakha kuleyondawo. Njengomuntu olokhe esakha ngaleso sikhathi bengithwele ezinye impahla zokwakha ngakho basebengilaya ukuthi kumele ngisuke kuleyondawo,” kutsho usobhuku Sibanda.

Uqhubekele phambili wathi ngoMvulo amapholisa la aphinda athutsha njalo. Ngalelolanga ayengasadlalanga nkotshana ngoba abwzange athande ukukhuluma okunengi afika adiliza isakhiwo sakhe nje.

“Amapholisa la aphenduka njalo ngoMvulo ekuseni ngingekho afika adiliza umuzi wami engazange achazele muntu ngesizatho sesenzo sabo.

“Phezu kwalokhu ekudilizeni kwabo ngacatshelwa zimpahla ezinengi,” kutsho uSibanda.

“Ngadana ngithola umuzi wami udiliziwe. Kwacatsha impahla zami ezimbalwa. Usizi kwaba yikuthi ibhakede lempuphu engangilithembile ngathola lingasekho kunye lemali angiyitholanga.”

Esinye isakhamuzi laso esihlala eMaqaqeni esingathandanga ukubizwa ngegama siveze ukuba indawo le okudilizwe khona umuzi kaSibanda bayiphiwa yiForestry Commission ngomnyaka ka 1993 kwathiwa nxa beqhubeka besanda esigabeni abantwababo bazakuyakwakha khona.

UMnumnzana Dumisani Ndlovu ohlala esigabeni seMafa ngaphansi kukasobhuku uBikita Ncube ngomunye njalo odilizelwe umuzi ngabeForestry Commission. UMnu Ndlovu uchaze ukuthi ubeqala ukwakha umuzi engakaqedi indlu yakuqala ngesikhathi abeForestry Commission bemdilizela umuzi.

“Kuthe kungoLwesine ekuseni ngisanda kufika emushasheni wami ngabona amapholisa eForestry esefikile. Afika angitshela ukuthi ngingakhi umuzi kangibuyele ngiyohlala emzini kababa ngoba lapho esengisakha khona akuvunyelwa muntu”.

Uthe udabukile enhliziyweni ngoba ubesezibona eselomuzi kodwa ngenxa yemithetho yenhlanganiso le kwehlule.
Kubikwa uMnu Sibanda usuke wayabikela ukhansila uSteven Ngwenya. Ukhansila wamtshela ukuba ayebikela amapholisa. Ukhansila Ngwenya usole kakhulu isenzo seForestry Commission endaweni ekhangelwe nguye ingamtshelanga.

Ekhuluma lentathelizindaba uMnu Ngwenya wethule ukuthi iForestry Commission le isihlukuluze izakhamizi kakhulu. Uthe iForestry Commision iyala njalo ukuthi umntwana engakhula akhe umuzi kule indawo, ithi kufanele bahlale ndawonye labazali babo.

UMnumzana Bravo Ndlelambi onguArea Manager kunhlanganiso yeForestry Commision uvumile ukuba inhlanganiso yabo isidilize eminye imizi kulindawo.

“Umuzi kaSibanda sawudiliza sibili ngoba wakhe endaweni yezinyamazana okungamelanga kwakhiwe khona. Umthetho weForestry Commission kawuvumi ukuthi umuntu akhe endaweni yezinyamazana njalo kawuvumi ukuthi imizi yande kakhulu esigabeni.”

UMnumzana Dumezweni Ndlovu osebenza kulinhlanganiso laye uthe ngokomthetho vele abantu abadilizelwa imizi abavunyelwa ukwakha lapho abakade besakha khona.

“Okwenza sadiliza umuzi kaSibanda yikuthi isisekelo seForestry Commission sika 2004 asivumi ukuba umuntu athengise umuzi abuye ahlale kuleyondawo. Ngakho-ke uSibanda wathengisa umuzi wakhe kulindawo ngenkomo manje usefuna ukwakha khonapha futhi.’

Omkhulu wabosobhuku eMafa leSomgolo uMnumnzana Albert Moyo wethule ukuba iForestry Commission iyabancindezela kakhulu ngoba kayivumi lokuthi kubuye uncedo kumbe isigaba sithuthuke ngendlela ezitshiyeneyo.

‘Besesakhe amadibha amathathu lapha kodwa isimanga yikuthi iForestry Commission ithi kawavalwe, ngikhuluma nje kawasebenzi avalwa. Thina abanini balesisigaba sesifana leziphepheli. Ngabe yenzeje isiza izakhamizi ngokunye kodwa ngitsho, kayisiphi lutho iyasincindezela kuphela.’

Indaba le kayikafiki emapholiseni eLupane.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds