uMthunywa
YiNtatheli kaMthunywa
KULANDELA ukubulawa kwenina lesigabeni seSikhewu eNkayi ngenye indoda ifuna ukunatha igazi, sekuvele ukuba imuli yakometheswacala isihlawuliswe inkomo eziyisificaminwe mibili, imbuzi eziyisikhombisa kanye lemali.
Iphephandaba likazulu lizwe ukuthi umetheswacala uChristopher Sibanda ngelanga abulala ngalo uSibusisiwe Sigauke watshona ethwele ingqamu ilanga lonke njalo ehwabha okwethusa abantu abanengi.
Ekhuluma lentatheli uMnumzana Bernard Ndlovu uveze ukuthi imuli yakoSigauke yayizonde igane unwabi ngokubulawelwa isihlobo sayo.
“AbakoSigauke babebheja ukuthi ngeke bambeke umntanabo kungazange kuhlawulwe inkomo ezingu-9 kodwa bacina bekhiphe ezingu-8,” kutsho uMnu Ndlovu.
Omunye okhulumisane loMthunywa okhethe ukungabethwa ngegama uthe uSibanda ngelanga enza ngalo isiga lesi watshona ephethe ingqamu.
“Ngelanga lakhona ezabulala, uChristopher wayebhoda ethwele ingqamu ebhonga njalo egqoke isiketi kanye lephenti lowesifazana.
“Ngezikhathi zemini yikho abulala khona uSigauke ngokumtshaya ngenduku wathi sewele phansi wasemgwaza wathatha igazi walifaka embizeni wanatha,” kutsho umfakazi lo.
Uphinde wathi wabanjwa yizakhamizi ezabikela amapholisa okwenza wabotshwa.
“Izakhamizi yizo ezathi zibona okwasokwenzakele zambamba zabiza amapholisa wabotshwa . Ngesikhathi abantu bembambile kulelinye inina elananzelela iphenti lalo elaligqokwe nguChristopher,” kulandisa ufakazi lo.
