uMthunywa
Arnold Ndlovu
KULAMADODA amabili elokitshini leDulibadzimu eBeitbridge abotshelwe ukweba impahla zabantu ngokuhamba ezenza amapholisa kumngcele weBeitbridge.
Amadoda la, uElvis Murombo kanye lo Osward Zhou aphikileyo icala aletheswayo abesetheswa amacala amathathu ngamunye okuzenza amapholisa, ukutshontsha lokungena endaweni engavunyelwayo emngceleni weBeitbridge engelamvumo.
Umtshutshisi walelicala uMnumzana Munyonga Kuvarega ubikele inkundla ukuthi mhlaka 17 Nkwenkwezi abasolwa balanda bethesa uMnumzana Spencer Tshuma ovela eKwekwe icala lokuhlala amalanga edlulisa lawo ayewaphiwe ukuthi awahlale kweleSouth Africa.
Kubikwa uMurombo waziveza njengomkhulu kaZhou esipholiseni. Kungakho bathe sebebona ukuthi uTshuma usethukile bamthathela ipasa yakhe andubana bamdonsele emkotweni lapho abafika bamthathela isikhwama semali esasile 3 500 Rands.
Inkundla izwe ukuthi uZhou wathatha iR800 kwasokusithi uMurombo wanika uTshuma iR 500 yena wasala leR2 200 andubana batshaye utshani.
UTshuma eqeda kubanjwa wayabikela amapholisa ahle athungatha ababili laba bababopha sebezama ukutshontshela abanye emngceleni lo.
Ngemva kokulalelisa ukuthonisiswa kwamacala la umantshi, uMnumzana Langton Nkwengi unqume ukuthi kucala lokuzenza amapholisa abasolwa bayepika inyanga ezine, kukanti kwelokutshontsha bagwetshwe inyanga eziyisithupha waphinda wabahlawulisa imali engange$100 ngecala lokungena endaweni abangavunyelwa khona, emngceleni.
