uMthunywa
Msilisi Dube
ABALIMI beSontala eKezi sebefundiswe ngokuqakatheka babuya bakhuthazwa ukuthi bakhe ama-tool sheds ukuze impahla zabo zokulimisa zigcinakale kuhle njalo zivikeleke ngesikhathi sebusika.
Kubikwa impahla yokulimisa egoqela amakhuba, amafotsholo, amajogwe, amaketane kunye lokunye okokulimisa okutshiyeneyo kumele kuvikelwe emkhathini oguqukayo ukuze umlimi engacini esethenga impahla zokulima ezintsha.
Ekhuluma lephephandaba likazulu kuyonale iviki, umlimisi walindawo uMnumzana Sympathy Kwangwari osebenza ngaphansi kogatsha lwezokulima lemitshina esetshenziswa ekulimeni, uthe abalimi kumele bakhe ama-shed ukuze nxa isikhathi sezulu sifika impahla le ibe ilungele ukusetshenziswa.
“Kuqakathekile ukuthi impahla yokulimisa ivikelwe ezulwini ngoba izulu liyona insimbi. Ikakhulu izulu lakuqala lona elandise ukuba lama-acids ayingozi ensimbini.
“Impahla yokulima akumelanga njalo ihlale elangeni ngoba amabhawudo alakho ukuwoma acine engasakhululeki.
Njengoba khathesi isikhathi sokulima sesidlulile kumele abalimi bebone ukuba impahla yabo ihlezi kuhle.
Amakhuba kumele afakwe i-grease ukuze amabhawudo akhululeke kuhle,” kuchasisa uMnu Kwangwari.
Itool shed ngokuyindlwana okwakhiwe sagalaji lapho abalimi ababeka khona impahla zabo zokusebenzisa ukuze zigcinakale kuhle. Umlimi kubikwa ulakho ukwakha indlu le esebenzisa amazenge kumbe afulele ngotshani ukuze impahla yakhe inganethwa kumbe itshiswe lilanga.
“Sengifundise abalimi abambalwa esigabeni sakithi ukuze impahla yabo ingonakali. Sikhangelele ukuthi abalimi bonke babe lama-tool sheds ngoba nxa impahla yokulima ingasagcinakalanga kuhle lokulima kuba nzima ngoba iyabe isimele ithengwe futhi,” kulandisa uMnu Kwangwari.
