uMthunywa
YiNtatheli kaMthunywa
AMALUNGA omdlalo wePool koBulawayo asebike ukuba azakuba lomhlangano ngoMgqibelo kuhloswe ukubopha inhlelo zokuqhutshwa kwalumdlalo kulumnyaka.
Umhlangano lo kukhangelelwe njalo ukuthi uqoqe ukhetho lwabakhokheli njengoba ababili batshiyana lezikhundla zabo ngendlela engacaciyo. Owayephethe isikhundla sikamgcinisihlalo uChristine Singwe wakhalala isihlalo esekelwa nguMandlenkosi Makohwa.
Bebuzwa ukuthi kungani batshiya izikhundla, bobabili banikeze isizatho sokuthi kulamalunga abazondayo kunhlanganiso yeBulawayo Pool Association. Abanye abakhalala izikhundla babalisa uRobin Goremucheche owayengumahluli wemidlalo loPhilani Mlotshwa obelilunga nje.
Iqula elikhokhela lumdlalo kulelidolobho lithe lizakuthi gwaqa eRaylton Sports Club ngehola lakuqala emini lapho okuzaphathwa njalo udaba lwezemali lokudinga usekelo lwemincintiswano.
Isikhulumi seBulawayo Pool Association uFarai Nyandoro uthe sebelungiselele baphelela ukuqoqa lumhlangano.
“Mhla welanga lomhlangano siqoqe ukuthi sizakhuluma ngezinto eziyisikhombisa. Sizaphatha lokho okwakhulunywa kumhlangano wanyakenye, kubalwe umbiko kamgcinisihlalo lokuphawulwa kombiko wokuphathwa kwemali ngo2016,” kutsho uNyandoro.
Ukukhalala umsebenzi okwenziwa ngabanye balinhlanganiso kutsho ukuba uNyandoro uzahlala phansi lamalunga amathathu kuphela, anduba kudingwe abatsha abazavala izikhala.
Abasele bebambe intambo kuBPA nguye uNyandoro, kulandele uLucy Mpofu umgciningcebo, uJohn Mahachi owabonompembe loFlata Moyo.
Kusenjalo, iqembu labomama eleZimbabwe Republic Police (ZRP) Bulawayo, lithumele uMthunywa umbiko wokuthi seliqalisile amalungiselelo alo omncintiswano weCommissioner General Sports Gala ozabe useHarare ngoMabasa.
Ithimu le isiqhatshe uDesmond Edwards ukuthi abengumqeqetshi wayo.
