uMthunywa
Ethel Ncube
BALOOKOMBA bantu bazwa kubinga atala azyabuumi bwabo nkambo mulange nchechi chibbadela cha Kariyangwe Mission Hospital tachikwe Dokotela pe alubo basilisi tabakwene pe chilookupa kuti abo bache baliwo bavulilwe amulimu wabalwazi.
Ipempa lyaMuthunywa lyamvwa kuti kuli basilisi bakayiila mulimu kusika ajulu babili kupela pesi kusilikwa bantu bazwa mumawadi ali musanu alinchicho.
Anze akubulika kwabasilisi kulookutegwa minsamu nakuti mapilisi alookubulika muchibbadela echi. Ipempa lyaluundu lyaambuula amwalumi utegwa Michael Mweembe uzwa nkuko waamba kuti basilisi mbache loko achibbadela echi.
“Chibbadela chasu chizwide bagwasyi babasilisi, echo chilookupa kuti tujane buyumuyumu nitwachiswa amwi malwazi asisinkene, nkambo ngatabajisi luzibo lumaninide pe.”
“Echi chilookutusyupa loko mbuuli bakali bakookuno nkambo malwazi miingi anga azooyinzigwa kunembo alubo bamwi ngawazoofwa nkambo kusilikwa abantu bayeeyela bya kabotu kaluzibo luche” kabapandulula ndeende baMweembe.
Wiinkilila kunembo kaamba kuti basilisi balaansi amutabi wazyabuponi bubotu bwabantu bavulilwa amulimu.
“Tujisi basilisi bobile byo balaansi lwamutabi wazyabuponi bubotu akubbasopwa kabotu kwabana achibbadela chasu echo chilookupa kuti bavulilwe mulimu aboobo ngabazoogwasigwa abagwasyi ma (nurse aid) batajisi luzibo lumaninide pe zipa kuti bantu kabapegwa mapilisi akutontobozya machise byo kakutalangwi akuti muntu unooli uchiswaanzi pe,’’ Kabapandulula baMweembe.
Simutola twaambo wayinkilila kunembo wambuula awumwi mukaintu utegwa Julia Muzamba kalookwamba kuti bajisi penzi pati loko akucheya kwabasilisi.
“Basilisi mbitulaabo tatubasoli pe, pesi tukumbila fulumende kuti ayungizye bambi basilisi kuchibbadela echi nkambo chibbadela chasu nchipati loko,’’ Kakupandulula baama baMuzamba.
Kaambula abasimutola twaambo Seneta wabaami bamuchoobwe cha Matebeleland North, BaSimwami Siansali waamba kuti kuyandikana kuyungizigwa bambi basilisi kuchibbadela cha kariyangwe Mission.
“Kariyangwe Mission hospital tiijisi dokotela pe alubo basilisi mbache loko nkambo tujisi bantu biingi loko basilikwa mpawo bazwa kumawadi ayinda musanu. Chibbadela chasu chilijisi mawadi akulazika bantu bachiswa aboobo mulimu anga wabavulila basilisi mbitujisi. Nkenkaako nchitukumbila kuli fulumende kuti ayungizizye basilisi alubo atupe dokotela kuchitila kuti bantu bajane lugwasyo afwifwi,’’ kalaamba BaSimwami Siansali.
