uMthunywa
Bongani Ndlovu
KULAMAJAHA amathathu elokitshini lePumula koBulawayo amiswe emthethwandaba kuyonale iviki esetheswa amacala amabili elokutshontsha inyawo zenkukhu lamathumbu kanye lelokuphambanisa ukuthula.
Abasolwa abathathu uKeith Banda loMthokozisi Moyo bonke abaleminyaka yokuzalwa engu-18 kanye lomunye esingeke saveza igama lakhe, oleminyaka engu-16 batholakale belamacala amabili; elokuphambanisa ukuthula komphakathi wePumula Old ngokujikijela amatshe ebhutsha yeGore Mucheche belabanye abasolwa abangakabanjwa lelinye elokutholakala belenyawo kanye lamathumbu enkukhu okutshotshiweyo ku-B 5505 ePumula Old.
Abathathu laba abamiswe ngoMvulo emini emthethwandaba weTredgold bakhangelelwe ukugwetshwa ngoLwesihlanu.
Umtshutshisi kulelicala uMnunzana uMufaro Mageza uthe phakathi kwamhlaka 14 kusiya ku-18 Zibandlela abasolwa kanye labanye abangaziwayo benza bephula umthetho ePumula Old Shopping Centre koBulawayo ngokujikijela ibhutsha yeGore Mucheche kanye lokubangela udlame elokitshini leli.
UMnu Mageza uthe elinye icala ababhekane lalo ngelokutholakala belenyama yakoGore Mucheche Butchery ngemva kokuba amapholisa kanye lamasotsha bebhode ezindlini bedinga impahla ezatshontshwa ezitolo.
Ekufikeni kwamapholisa bafica kulamaphakethe alitshumi ama-500 grams enyawo kanye lamathumbu enkukhu.
Ngemva kokulalela icala leli umantshi uthole abathathu laba belecala andubana anqume ukuba baphenduke emthethwandaba ngoLwesihlanu mhlaka 25 Zibandlela bevela ejele.
Umsolwa oleminyaka engu-16 yena uzanikwa isigwebo sakhe evela ngekhaya.
