uMthunywa
MTHWAKAZI omuhle ngokuthokoziswa kusa kwamalanga liphephandaba likazulu lakuyonale iviki lize lazo njalo eziluluju bakaMthwakazi. Njengoba lidume ngezimnandi zodwa kule iviki likuphathele iqembu likamaskandi Abafana bakaMzilikazi.
Othanda ukuzithokozisa nansi ingxoxo ehlabusayo phakathi kwentatheli yephephandaba likazulu uArnold Ndlovu (AN) lelunga leqembu leli uDoit Nkomo (DN).
AN: Akuthi fahlafahla uzulu ngembali yeqembu leli kanye lomculo eliwenzayo?
DN: Igama lami nguDoit Nkomo ngidabuka eTsholotsho esigabeni seSusumane ngafunda eMazibisa Primary School. Ngaqhubeka ngaya ezifundweni zaphezulu eMavela Government School.
Ngingomunye wabasunguli beqembu elibizwa Abafana bakaMzilikazi. Njengentsha enengi yakoMthwakazi sagijimela eNingizimu Africa ukuzozama impilo. Umculo kamaskandi sawuqala ngo2010 lensizwa zakithi kodwa abanye sebatshiya baqala awabo amaqembu okwakhathesi ngisebenza lomngane wami uNewman Tshuma.
AN: Tshela uzulu mfokaMasiya ukuthi njengomculi kamaskandi selakhipha amadlalade amangaki njalo abantu bawuthatha njani umsebenzi wenu?
DN: Njengeqembu eselileminyaka lasungulwa siyathanda ukuthi sikhiphe amadlalade minyaka yonke ndoda, okwakhathesi silamadlalade amahlanu. Elokuqala ngelithi Bathini abafana, Hlehlani bafana, Ungubaba onjani, Intandane lethi Usizi lamaDVD amabili.
AN: Kuhle lokhu. Njengeqembu litshayela ngaphi ingoma zenu ukuze abantu babekwazi ukulithola?
DN: Njengabantu abahlala eNingizimu Africa abantu abathanda umculo wethu balakho ukusibona eHillbrow, Germiston, Alexandra, Soweto, Diepsloot, Tembisa, kuthi nxa silapha ekhaya sijayele ukutshaya sise Plumtree, eTsholotsho lasedolobheni lakoBulawayo.
AN: Njengoba selakhipha amadlalade lawa uzulu limthembisani kusiyaphela wonalo umnyaka kusiya phambili?
DN: Lonyaka sikhangelele ukujabulisa uzulu ngelinye idlalade elizaphuma ngoMpalakazi kodwa alikabi lesihloko. Ngedlalade leli sizazama ukusebenza nzima sipheke leDVD siphinde sizothokozisa abantu bakithi ngesikhathi sekhefu.
AN: Akutsho, bunzima bani elihlangana labo kumaskandi njalo lingathanda ukuthi uHulumende alenzeleni ekuliphathiseni?
DN: Ubunzima obukumaskandi yikuthi asitholi isponsorship ngalokhu kwenza umsebenzi wethu ucine uphuma isikhathi singakafiki kumbe ungaphekekanga kuhle.
Njengabaculi besingathanda ukuthi uHulumende asincedise ekulweni labantu abathengisa umculo wethu ngokungekho emthethweni ngoba kuyasibulala singabahlableli sigcina sithola udumo ebantwini kodwa ezikhwameni kungela lutho esiluzuzayo.
